Abo kwa Rwigara barasabirwa kurekurwa kuko bari mu maboko y’Urukiko rudafite ububasha bwo kubaburanisha

Abunganira mu mategeko Adeline Rwigara n’abakobwa be aribo Anne Rwigara na Diane Rwigara basanga ibirengo bishinjwa abakiriya babo nta gaciro bifite kuko bari mu maboko y’urukiko rudafite ububasha bwo kubaburanisha.

Nk’uko byari byatangajwe ku wa Gatanu w’Icyumweru gishize, kuri uyu wa Mbere tariki 16 Ukwakira 2017 nibwo Adeline Rwigara n’abakobwa be bitabye urukiko kugira ngo baburane ku ifungwa n’ifungurwa by’agateganyo.

Mu itangira ry’urubanza umucamanza yatangiye avuga ko hari ibikubiye mu myirondoro y’abaregwa bigaragaza ko Anne Rwigara na Diane Rwigara baba ari impanga, kuko bose bigaragara ko bavutse mu 1981 ,maze asabye ko babanza kuvuga amatariki nyayo y’amavuko.

Mu gusubiza umucamanza ,Diane Rwigara asobanura ko yavutse tariki 6 Kanama 1981 naho Anne Rwigara we asobanura ko yavutse tariki 16 Nzeri 1982.

Perezida w’iburanisha kandi, yavuze ko hari inzitizi yatanzwe na Me Gatera Gashabana wunganira mu mategeko Adeline Mukangemanyi Rwigara. Yavuze ko hari inzitizi yise iy’Iburabubasha, aho yavuze ko urukiko rugomba kubanza gusuzuma niba rufite ububasha bwo kuburanisha uwo yunganira mu mategeko.

Ingingo ya 99 na 100 zivuga ko inkiko zoze zo mu Rwanda zifite ububasha bwo kuburanisha imanza z’ifungwa n’ifungurwa ry’agateganyo uretse urukiko rukuru n’urwa gisirikare. Kandi ukekwaho icyaha akaburanishirizwa ku rukiko ruri hafi y’aho uregwa afungiye.

Me Gatera Gashabana yavuze ko ingingo 99 y’itegeko rigena imiburanishirize y’imanza ijyanye n’ifungwa ry’agateganyo, ivuga ko urukiko rufite ububasha bwo kumuburanisha ari ururi hafi y’aho yafatiwe. Yavuze ko uwo yunganira yafashwe agafungirwa kuri sitasiyo ya Remera, kandi ko urukiko rw’ibanze rwa Kacyiru ruhegereye kurusha urwa Nyarugenge ruherereye i Nyamirambo, bityo akavuga ko uru rukiko rudafite ububasha ndetse n’ikirego cyatanzwe n’Ubushinjacyaha kikaba kidafite agaciro. Mu magambo ye yavuze ko n’ubwo atari inzobere mu by’ubumenyi bw’isi, ngo n’umwana w’igitambambuga yabona ko Kacyiru ari hafi y’i Remera kurusha i Nyamirambo muri Nyarugenge.

Ku rundi ruhande Me Pierre Celestin Buhuru wunganira Anne Rwigara na Diane Rwigara nawe yavuze ko asanga abo yunganira bafite uburanganzira bwo gushyikirizwa ubucamanza bubifitiye ububasha, kuko ngo abantu bafashwe bagafungirwa i Remera muri Gasabo, batagombaga kujya kuregerwa urukiko rwa Nyarugenge mu karere ka Nyarugenge.

Me Pierre Celestin Buhuru yakomeje avuga ko ubushinjacyaha budakwiye kuvuga ko bafatiwe mu Kiyovu aho batuye kuko Itegeko rivuga aho bafungiwe ritavuga aho babasanze. Kandi nabwo yavuze ko n’iyo byaba ibyo, hari urundi rukiko rw’ibanze rwa Nyarugenge ruri hafi ya CHUK, bityo ko atumva uko bagejejwe i Nyamirambo mu rukiko rwisumbuye rwa Nyarugenge.

Yunzemo kandi ko abo yunganira kugeza ubu ari abere kuko batarahamwa n’ibyaha, bityo asaba ko bahita barekurwa nta mananiza kuko aho bafungiwe bari mu maboko y’urukiko rudashobora kubaburanisha kuko nta bubasha rufite.

Nk’uko bisanzwe umutekano ku rukiko ukaba wakajijwe aho uwinjira wese abanza gusakwa n’abapolisi akerekana irangamuntu cyangwa ikindi kimuranga aho imyirondoro ye yandikwa mu gitabo.

Ubushinjacyaha bwavuze ko iyi nzitizi ivugwa n’uruhande rw’abaregwa igamije nanone gutinza urubanza, ko itagomba guhabwa agaciro.

Buvuga ko yavuze ko ingingo ya 99 itegenya ko bashobora kuregera urukiko rwose rwegereye aho uregwa yafungiwe kuko ngo mu manza nshinjabyaha nta kugenekereza bibamo.

Bukavuga ko umushinjacyaha ari we uhitamo Urukiko rumwegereye aregera kandi bizorohera abaregwa kugezwa ku rukiko, akavuga kandi ko nta bimenyetso abaregwa bafite by’ibirometero biri hagati y’inkiko bavuga n’aho bafungiye.

Ubushinjacyaha buvuga ko abaregwa bakomeje gutanga inzitizi zidafite ishingiro bagamije gutinza urubanza rwabo. Asaba ko izi nzitizi ziteshwa agaciro iburanisha rigakomeza.

Ubushinjacyaha buvuga ko izo ngingo z’amategeko buzemeranywaho n’abaregwa ariko butemeranya nabo uko bazihuza n’inzitizi.

Ngo bari kuba bararenze ku mategeko iyo baregera Urukiko rukuru cyangwa urw’Ikirenga.

Nyuma yo gusuzuma inzitizi zatanzwe n’abaregwa, Urukiko rwanzuye ko nta tegeko ryishwe haba mu gufatwa no kuregera uru rukiko rwisumbuye, rwanzura ko rutesheje agaciro inzitizi zatwanzwe n’abunganira abaregwa.

Ubushinjacyaha bwahise buhabwa umwanya ngo bushinje abaregwa bunagaragaza impamvu ari bo bakekwa.

Ubushinjacyaha bwifuza ko igice kimwe cy’urubanza cyabera mu muhezo kuko bufite ‘Audio’ 20 zishinja abaregwa, kandi ngo umunani (8) muri zo zishyizwe ku karubanda byabangamira umutekano w’abazivugwamo.

Ngo hari abazivugwamo bagikorwaho iperereza, bikaba nabyo byaribangamira.

Ubushinjacyaha bwasabye ko no kwiregura kuri izo ‘Audio’ umunani byabera mu muhezo.

Ubushinjacyaha bwasabye kandi ko abatangabuhamye bumviswe amazina yabo atashyirwa ku mugaragaro.

Ubushinjacyaha buvuga ko bamwe mu bavugwa muri izo ‘Audio’ ngo bashobora kugirirwa nabi n’abakekwaho ubufatanyacyaha n’aba baregwa. Ngo ni no kubangamira iperereza rikomeje.

Me Gashabana wunganira Adeline Rwigara Mukangemanyi yahise avuga ko izo ‘Audio’ zitamenyeshejwe abaregwa ngo bazisobanureho mu bugenzacyana no mu bushinjacyaha, bityo ko izo Audio zidakwiye kwakirwa kuko binyuranyije n’amategeko.



Tanga igitekerezo kuri iyi nkuru



Igitekerezo