Abasirikari ba Amerika n’aba Niger baguye mu mutego

Abasirikare batatu ba Amerika bishwe abandi babiri barakomereka mu mutego w’abantu bataramenyekanye mu gihugu cya Niger ku rubibi rwa Mali nkuko amakuru atangazwa abivuga. Nkuko tubikesha BBC, amakuru aravuga ko hari abasirikare benshi bo muri Niger bapfuye muri icyo gitero.

Igisirikare cya Amerika gikorera ku mugabane wa Afrika "US Africa Command" cyavuze ko abasirikare bari mu bikorwa byo kugenzura akarere baguye mu muriro w’abanzi bityo hakaba hagikorwa iperereza ngo hamenyekane amakuru arambuye y’abakoze ibi.
Igisirikare cya Amerika kimaze igihe giha imyitozo igisirikare cya Niger kugira ngo gishobore kurwanya intagondwa z’aba Islamu ziri mu karere zirimo izo mw’ishami rya al-Qaeda ryo mu burasirazuba bwa Afrika.
Abo barwanyi bakorera cyane mu gihugu gituranyi cya Mali aho abasirikare b’abafaransa bigeze guhangana nabo muri 2013 bababuza kugana mu gace barimo.
Umutwe wa Boko Haram uri muri Nigeria mu magepfo umaze kugaba ibitero byinshi mu gihugu cya Niger.
Perezida wa Amerika Donald Trump yamenyeshejwe amakuru y’icyo gitero n’uyoboye ingabo John Kelly nkuko umuvugizi wa White House Sarah Sanders yabivuze.
Ikinyamakuru New York Times nacyo cyanditse iyi nkuru kivuga ko ibyavuzwe n’ umusirikare ko abasirikare batatu bo mu mutwe wa Army Green Berets-mu nteko zihambaye za Amerika- ari bo bishwe mu mutego ku birometero 193 mu burasirazuba bwa bw’umugi wa Niamey ari nawo murwa mukuru w’igihugu cya Niger.
Iki kinyamakuru kivuga kandi ko babaye abasirikare b’abanyamerika ba mbere baguye mu mitego y’abanzi kuva igihe umutwe w’ingabo za Amerika witwa US Africa Command woherejwe muri Niger.
Abandi basirikare babiri ba Amerika bakomeretse bidakomeye cyane ubu bakaba bagiye kuvurirwa mu gihugu cy’u Budagi nkuko abanyamakuru ba CNN bavuze.
Umuyobozi wo mu ntara ya Tillaberi yabwiye Reuters ko abasirikare batanu ba Niger ari bo bari mu bapfuye. Gusa kugeza ubu ubutegetsi bw’iki gihugu ntibwashoboye kuvuga abarashe abo basirikare abo ari bo.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo