Abasirikare 10 ba Congo-Kinshasa  bishwe  n’inyeshyamba

Sosiyete Sivile ya Irumu mu Ntara ya Ituri ho muri Repubulika Iharanira Demokarasi ya Congo iravuga ko abasirikare 10 ba Leta bamaze kwicwa n’inyeshyamba z’umutwe wa Force de résistance patriotique de l’Ituri (FRPI) mu gace Walendu Bindi mu gihe cy’ukwezi kumwe gusa.

Umuyobozi w’iyi Sosiyete Sivile, Gyli Gotabo avuga ko aba basirikare baguye mu bitero byagiye bigabwa n’izi nyeshyamba ku birindiro by’ingabo za Leta muri aka gace.

Umuvugizi w’ingabo za Congo mu Ntara ya Ituri avuga ko aba basirikare bicwa n’inyeshyamba bitewe n’uko zikingirwa ikibaba n’abaturage ba Walendu Bindi.

Gyli Gotabo yabwiye Radio Okapi ko hakenewe ubukangurambaga busaba abaturage gukorana bya hafi n’ingabo za Leta ndetse bakajya batanga amakuru y’aho babonye inyeshyamba.

Sibyo gusa kandi anasaba igisirikare kutica inyeshyamba zemeye gushyira intwaro hasi mu rwego rwo gukanguririra abakiri mu mashyamba kuza bagakorera igihugu cyabo.

Gabriel Habineza/Umubavu.com



Tanga igitekerezo kuri iyi nkuru



Igitekerezo