Abarwanyi ba M23,umutwaro ukomereye Uganda

Abarwanyi b’umutwe wa M23 ngo bakomeje kuba umutwaro ukomereye Leta ya Uganda kuko Repubulika Iharanira Demokarasi ya Congo itigeze yubahiriza amasezerano yo mu 2013 yashyiriweho umukono i Nairobi muri Kenya.

Ibi bikaba byaratangajwe na Minisitiri w’Ububanyi n’Amahanga w’Igihugu cya Uganda, Sam Kuteesa wavuze ko Abarwanyi ba M23 bakomeje kuba umutwaro ukomeje kuri iki gihugu kuko badashoboye ngo babe imfungwa mu buryo bwemewe cyangwa se ngo bashobore babe impunzi.

Mu kiganiro Sam Kuteesa yahaye Abadipolomate b’ibihugu bitandukanye ku wa Kabiri tariki 5 Nzeri 2017 , yavuze ko Leta ya Congo itigeze yubahiriza ibikubiye mu masezerano y’i Nairobi aho M23 yagombaga kuba Ishyaka ryemewe n’amategeko naho Congo igashyira bamwe mu barwanyi bayo mu gisirikare ndetse n’abandi ikabafasha gusubira mu buzima busanzwe.

Bamwe mu barwanyi ba M23 bakaba bacumbikiwe muri Uganda mu kigo gitanga imyitozo ya gisirikare cya Bihanga.

M23 ikaba ikunze gushinja Leta ya Congo kuba ntacyo ikora ku bwicanyi bukomeje guca ibintu muri iki gihugu gusa Leta ya Congo nayo ikunze gushyira mu majwi uyu mutwe kuba uri inyuma y’ubwicanyi buhitana abantu gusa uyu mutwe ubitera utwatsi.

Umutwe wa M23 watangiye urugamba rwo kurwanya Leta ya Congo muri Werurwe 2012 nyuma waje gutsindwa mu Gushyingo 2013 ari nawo mwaka aya masezerano ya Nairobi yashyizweho umukono aho Uganda yari umuhuza.

Kuva M23 yatsindwa bamwe mu barwanyi bayo bahungiye mu Rwanda ikindi gice kinini gihungira Uganda.

Muri Mutarama 2017 Repubulika Iharanira Demokarasi ya Congo yavuze ko hari abanywanyi b’uyu mutwe bagarutse guhungabanya umutekano gusa nyuma gato Leta ya Uganda yashimangiye ko yafashe abarwanyi 101 b’uyu mutwe bagerageza kwinjira muri Congo aho bafatiwe i Mbarara batorotse igihugu bafugiye ahitwa Makenke.

Gabriel Habineza/Umubavu.com



Tanga igitekerezo kuri iyi nkuru



Igitekerezo