Abarwanyi ba FDLR  bayitamaje

Abahoze muri FDLR 9 n’imiryango ya bo 17 batahutse ku wa 21 Nzeli 2017 bemeza ko bari batunzwe no kwiba no kwambura abaturage ndetse no gukorera abandi.

Aba barwanyi bavuga ko bariho mu buzima bubi ku buryo uyu mutwe wa FDLR wafataga abana babo bakiri bato bakabajya mu gisirikare.

Bemeza ko bari bamaze kurambirwa ubuzima bw’ishyamba ikaba ari yo mpamvu yatumye bahitamo gutaha bakitandukanya n’uyu mutwe wacitsemo ibice bibiri.

Aba barwanyi bavuga ko n’ubwo bakoraga igisirikare cy’ishyamba bababazwaga no kubona abana bato bajyanwa mu gisirikare cy’izi nyeshyamba.

Hakizimana Taifa, umwe muri aba barwanyi yagize ati “ Twariho mu buzima bubi, twabaga dutunzwe no kwambura abaturage, ariko twabonye ubuzima bwo mu ishyamba buturambiye duhitamo gutaha, ikindi kandi wasangaga ari abantu batagira gahunda (FDLR) kuko wabaga ugiye kurwana warasize umwana muto w’imyaka nka 13 wajya kubona ukabona agusanze mu ishyamba, ni ikibazo cyari kidukomereye kubona urwana uri kumwe n’umwana wawe wakabaye ari ku ishuri”

Akomeza agira ati “ Iyo tutabaga twagiye kwambura abaturage wasangaga bamwe bacana amakara cyangwa umuntu akagura urutaro rw’ibitoki akenga inzoga cyangwa agacuruza kasusu, umuntu akareba ko bwacya kabiri”.

Yungamo ati “ Ibyo kurya byo, aho byeze ni ho twaryaga, twaryaga nk’inyoni, mu gihe ibyo kwambara byo buri wese yirwanagaho.”

Muhawenimana David w’imyaka 16 avuga ko abana babaye bakuru bose bazaga kubafata ku ngufu bakabajyana mu barwanyi ba FDLR.

Ati “Bahera ruhande guturuka ku myaka 15 ni uguhita bagufata, baratubwiraga ngo bazarwana bagere ino aha ariko njye mbona batari kuhagera, nta kintu mbona bazageraho”

Bizimana Bahati wabaga muri FDLR FOCA we ati “ Twebwe twajyaga gufunga abantu kugira ngo tubone amafaranga yo kunywera, nagiye ngenda ijoro, nagera aho ngeze nkiyorosa ikobe ry’ibishyimbo kugeza ngeze aho abashinzwe kuducyura baherereye”.

Akomeza agira ati “ Abatabashaga kwambura, bagendaga bakajya kwaka ibiraka ahantu, ugasanga umuntu afashe nk’ibiti by’umuntu akamusaba ko abicanamo amakara hanyuma bakazagabana, mbese bamwe wasangaga ari abambuzi abandi bakorera abaturage”.

Aba barwanyi bavuga ko FDLR ibayeho nabi ku buryo abenshi bakagombye kuba baratashye, ngo icyo batinya ni uko bafashwe bataha bashobora kwicwa.

Kugeza ubu abarwanyi ba FDLR bakaba baracitsemo ibice bibiri ari byo FDLR/FOCA na CNRD, hakaba hamaze gutahuka abarwanyi 11085 kuva gahunda yo kubasubiza mu buzima busanzwe yatangira.



Tanga igitekerezo kuri iyi nkuru



Igitekerezo