Abarwanyi  ba FDLR 13 barimo abafite  amapeti yo hejuru  bashyize intwaro hasi bataha mu Rwanda

Ingabo z’Umuryango w’Abibumbye ziri mu butumwa bw’Amahoro muri Repubulika Iharanira Demokarasi ya Congo (MONUSCO) zivuga ko zashyikirije u Rwanda abarwanyi ba FDLR 13 barikumwe n’abagize imiryango yabo bagera kuri 39 kuri uyu wa Kabiri tariki 4 Ukwakira 2017.

Muri aba barwanyi batahutse barimo ufite ipeti rya Majoro n’undi ufite ipeti rya Kapiteni ngo bose bakaba baravuye muri Teritwari ya Masisi mu gace ka Kichanga na Kibabi mu Ntara ya Kivu y’Amajyaruguru

Kapiteni Jean Bosco Hitimana Mwesa uri mu batahutse akaba yasobanuye ko batashye mu Rwanda ku bushake ko nta muntu wigeze abashyiraho igitutu ngo bakaba barabikoze nyuma yo kumenya ko mu Rwanda ari amahoro.

Kapiteni Hitimana akaba akangurira abasigaye mu mashyamba ya Congo kuza mu gihugu cy’Ababyaye kuko abatashye bamaze kugera kuri byinshi ati’’Abari mu mashyamba barababarira ubusa kuko bababeshya ko nibaza mu Rwanda bazicwa ,ni ikinyoma’’

Akomeza avuga ko abagiye bataha ubu bamaze gufatisha ubuzima ,bagiye bahabwa inka ndetse bagahabwa n’inguzanyo mu mabanki aho babayeho neza bityo akaba yumva aricyo gihe ngo FDLR ihe Congo amahoro.

Gabriel Habineza/Umubavu.com



Tanga igitekerezo kuri iyi nkuru



Igitekerezo