Abarundi 34 bishwe barashwe, abandi 124 barakomereka

Ubuyobozi bw’agace ka Kamanyola bwemeje ko abantu 34 aribo baguye mu gushyamirana kwabaye kuri uyu wa Gatanu, tariki ya 15 Nzeri 2017, hagati y’ingabo za leta n’Abarundi basabaga ubuhungiro mu Ntara ya Kivu y’Amajyepfo.

Nk’uko Radio Okapi yabitangaje, umuyobozi muri ako gace, Bertin Zagabe, yavuze ko hari abandi 124 bakomeretse, ubu bari kuvurirwa mu bitaro bya Kamanyola na Luvungi.

Muri ako gace hahise hahamagazwa inama y’umutekano i Bukavu, inzego zose z’umutekano zikorana uko zakabaye hamwe na MONUSCO n’ishami ry’Umuryango w’Abibumbye ryita ku mpunzi, HCR.

Nyuma y’iryo sanganya, umuhanda uva muri Congo utunguka mu Bugarama mu Rwanda wahise ufungwa ndetse ibikorwa bitandukanye muri Kamanyola birahagarara.
Kuwa Gatanu ahagana saa kumi z’umugoroba, nibwo itsinda ry’abantu bakomoka mu Burundi basabaga ubuhungiro, bagiye kwigaragambiriza ku biro by’inzego z’umutekano, basaba ko bagenzi babo bane bari bafashwe mu iperereza barekurwa.

Inzego z’umutekano zari zabafashe zikeka ko aho bacumbitse hashobora kuba hacurirwa intwaro za gakondo.

Iyo myigaragambyo yaje gufata indi ntera ubwo abo Barundi bakoreshaga amabuye bayatera ku bapolisi, kugeza ubwo haje no gukoreshwamo imbunda, ingabo z’igihugu, FARDC, ziratabara.

Amakuru avuga ko muri izo mpunzi hatahuwemo imbunda yo mu bwoko bwa AK 47, bakaba baranishe abasirikare babiri ba Congo babarashe, undi umwe arakomereka.
Mu itangazo Guverinoma y’u Burundi yasohoye kuri uyu wa Gatandatu tariki 16 Nzeri, yavuze ko ibikorwa byabaye ari ubwicanyi nk’ubundi, isaba Guverinoma ya Congo Kinshasa, MONUSCO na HCR kubitangira ibisobanuro.



Tanga igitekerezo kuri iyi nkuru



Igitekerezo