Abagabo batatu  bafatanywe moto ebyiri bakekwa ko  bibye

Polisi y’u Rwanda yafatanye abagabo batatu moto ebyiri bakekwa kuba baribye, izishyikiriza ba nyirazo ; ifatwa ryazo rikaba ryaratewe n’uko abibwe babimenyeshe Polisi bidatinze.

Uwitwa Sindayigaya Haruna yafatiwe mu karere ka Gicumbi ku itariki 28 Ugushyingo uyu mwaka atwaye moto ifite pulake RC 779Z yibwe Rukundo Jean ; naho Rafiki Jean Bosco na Ntirenganya Jean Claude bafatiwe mu karere ka Kicukiro ku itariki 26 z’uku kwezi barimo gushaka umuguzi wa moto ifite pulake TVS 942 U yibwe Mboneye Niyonshuti.

Umuvugizi wa Polisi mu Mujyi wa Kigali, Superintendent of Police (SP) Emmanuel Hitayezu yavuze ko Rafiki na Ntirenganya bafatiwe mu kagari ka Kamashashi, mu murenge wa Nyarugunga ahagana saa kumi z’umugoroba wo ku cyumweru barimo gushaka umuguzi w’iyo moto.

Yagize ati,"Iperereza ry’ibanze rigaragaza ko nyiri iyo moto yayihaye Rafiki ngo akorere amafaranga atwara abagenzi ; hanyuma afatanya na Ntirenganya kuyishakira abaguzi. Ifatwa ryabo ryaturutse ku makuru yatanzwe n’umwe mu bazi iyo moto na nyirayo wumvise barimo kuyigurisha, abimenyesha nyirayo wahise abibwira Polisi irabafata."

SP Hitayezu yibukije ko gutangira amakuru ku gihe ari ingenzi mu gukumira icyahungabanya umutekano ndetse n’icyabangamira ituze n’amahoro bya rubanda.

Ku byerekeye uburyo Sindayigaya yafashwe, Umuvugizi wa Polisi mu Ntara y’Amajyaruguru, Inspector of Police (IP) Innocent Gasasira yabisobanuye agira ati," Ahagana saa kumi n’ebyiri z’umugoroba wo ku itariki 28 z’uku kwezi, Rukundo usanzwe ukora akazi k’Ubumotari yahamagaye Polisi ayimenyesha ko hari umuntu umwibye moto aho yari ayiparitse mu kagari ka Gacurabwenge, mu murenge wa Byumba. Polisi imaze kubona ayo makuru yatangatanze imihanda yose yakekaga ko uwari umaze kuyiba yashoboraga kunyuramo, nyuma y’amasaha atageze kuri atatu iyifatana Sindayigaya ayigejeje mu kagari ka Gihembe, mu murenge wa Kageyo."

IP Gasasira yashimye nyiri iyo moto kuba yaramenyesheje vuba Polisi iby’ubwo bujura ; ndetse asaba abatuye Intara y’Amajyaruguru muri rusange kuba ijisho ry’umuturanyi no kwirinda ibyaha aho biva bikagera.

Polisi yashyikirije izo moto ba nyirazo. Rafiki na Ntirenganya bafungiwe kuri Sitasiyo ya Polisi ya Nyarugunga, naho Sindayigaya afungiwe ku ya Byumba.

Umuntu uhamwe n’icyaha cy’ubujura budakoreshejwe kiboko cyangwa ibikangisho ahanishwa igifungo kuva ku mezi atandatu (6) kugeza ku myaka ibiri (2) n’ihazabu y’amafaranga y’u Rwanda yikubye inshuro kuva kuri ebyiri (2) kugeza kuri eshanu (5) z’agaciro k’icyibwe cyangwa kimwe gusa muri ibyo bihano nk’uko biteganywa n’ingingo ya 300 y’Igitabo cy’amategeko ahana ibyaha mu Rwanda.



Tanga igitekerezo kuri iyi nkuru



Igitekerezo