Abagabo 5 barashinjwa bakodesha ibyuma by’imodoka bakabona ubuziranenge bw’ibinyabiziga

Kuwa gatanu itariki ya 22 Nzeri, Polisi y’u Rwanda ishami ryayo rishinzwe umutekano wo mu muhanda, ryerekanye abantu batanu barimo abashoferi n’abakanishi bafashwe bakekwaho gukoresha uburiganya ngo babone ibyangombwa by’ubuziranenge bw’ibinyabiziga.

Aba bafashwe ni : Nsengiyumva Bernard w’imyaka 26, Ndinkabandi Joseph w’imyaka 51, Bagonde Fred w’imyaka 60, Kagabo Jean Damascene w’imyaka 32 na Nyirimpuhwe Emmanuel w’imyaka 22.

Umuvugizi w’ishami rya Polisi y’u Rwanda rishinzwe umutekano wo mu muhanda Chief Inspector of Police (CIP) Emmanuel Kabanda yavuze ko ibyo Polisi y’u Rwanda ikora byose biba bigamije gukumira no kurwanya ibyaha, by’umwihariko ishami ryayo rishinzwe umutekano wo mu muhanda ari naho ikigo cya Polisi y’u Rwanda gipima ubuziranenge bw’ibinyabiziga kizwi ku izina rya “contrôle technique” kibarizwa, rikaba rishinzwe gukumira no kurwanya impanuka, ariko hakaba hari bamwe mu batwara ibinyabiziga baba bashaka gukwepa icyatuma ibinyabiziga byabo bidakora impanuka zitwara ubuzima bw’abagenzi.

CIP Kabanda yasobanuye icyo aba bose bafatiwe, akaba yavuze bose ari abafatanyacyaha, dore ko bamwe ari abashoferi abandi bakaba ari abakanishi.

Mu kubisobanura yavuze ati :” Abashoferi baje gusuzumisha ubuziranenge bw’ibinyabiziga byabo, ababishinzwe basanga hari icyuma gifasha imodoka gukata neza kizwi nka “Biolette”, basabwa kujya kugihinduza ngo bashyiremo icyuzuje ubuziranenge, aho kubigura bajya mu igaraji barabikodesha babishyiramo, bagaruka gusuzumisha imodoka zabo, ariko kuko abapolisi bacu bari bafite amakuru ko hari abajya babikora nibwo babafashe, babaza aho babikoreshereje bajya kuhabereka ari nabwo bahise bafatwa.”

Yavuze ko ibi bikorwa n’aba bashoferi ari bimwe mu biteza impanuka kuko iyo bamaze gukodesha ibi byuma bakagaruka baca mu byuma bisuzuma ubuziranenge bw’ibinyabiziga bigasanga imodoka nta kibazo ifite, bagera muri rya garaji bagasubiza bya byuma bakodesheje, basubira mu muhanda ukabona imodoka ikoze impanuka kandi aribwo ikiva mu kigo gisuzuma ubuziranenge bw’ibinyabiziga.

Umwe mu bafatiwe muri ibi bikorwa witwa Nsengiyumva Bernard, umukanishi w’imodoka ukorera i Remera hafi y’iki kigo gisuzuma ubuziranenge bw’ibinyabiziga yavuze ati :”Nibyo koko nafashwe maze gukodesha iki cyuma n’umwe mu bashoferi, ndetse ndimo no kukimushyiriramo, bakaba bakidukodesha ibihumbi icumi by’amafaranga y’u Rwanda kuko igishya kigura ibihumbi mirongo itatu na bitanu.”

Yakomeje avuga ati :”Ndakangurira abashoferi n’abakanishi kwirinda uburiganya nk’ubu, kuko bushobora guteza impanuka, abashoferi nkabasaba kujya bagura ibyuma by’umwimerere aho kubikodesha.”

Nsengiyumva yanavuze ko mu gihe cy’amezi icyenda yari amaze atangiye gukora iki gikorwa yita ko kigayitse, yakodesheje abashoferi bagera kuri 20, babona uruhushya rw’ubuziranenge bw’ibinyabiziga kandi imodoka zabo zitujuje ibisabwa.

Undi witwa Ndinkabandi Joseph yavuze ko biolette ishobora kugira uruhare mu mpanuka, kuko nk’igihe irwaye ngo umushoferi ashobora gukata imodoka ntirangize ikona ry’umuhanda bikaba byatera impanuka, agasaba abandi bashoferi gukora ibiciye mu mucyo.

Yavuze ati :” Ibi bintu ni igikorwa kigayitse nta mushoferi wakagombye kubisubiramo, ibyatubayeho bigomba kubabera isomo bakareka kwinjira mu gikorwa nk’iki, kandi bamenye ko Polisi y’u Rwanda iri mason ta munyabyaha upfa kuyicika.”

CIP Kabanda yavuze kandi ko abashoferi bakwiye kujya bagura ibyuma byujuje ibuziranenge baba bagiriwemo inama n’ikigo kigenzura ibinyabiziga kugirango birinde impanuka

Yavuze ati :”Gusuzumisha ubuziranenge bw’ibinyabiziga bifite akamaro ku mpamvu ebyiri nkuru, iya mbere ni umutekano rusange w’abagenzi, iya kabiri ni kuri nyir’ikinyabiziga, kuko iyo cyakoze impanuka nawe arahomba.”

Yasoje avuga ko atari buriya bwoko bw’ibyuma byonyine abashoferi bakodesha, ko hari n’ibindi bizwi nka “roture”, amapine, n’ibindi, ndetse ngo hari n’abatira ibirahure by’imbere by’imodoka bizwi nka (Parre- brise).

Aba bagabo bahamwe n’icyaha bashobora guhanwa hisunzwe ingingo ya 612 y’igitabo cy’amategeko ahana ibyaha mu Rwanda, ihana ibikorwa byo Guhabwa ku bw’uburiganya cyangwa gukora no gukoresha inyandiko n’impapuro bitangwa n’inzego zabigenewe,igateganya ibihano birimo igifungo kuva ku myaka itanu kugera kuri irindwi n’ihazabu y’amafaranga kuva ku bihumbi Magana atatu (Frw300 000) kugera kuri miliyoni eshatu (Frw 3 000 000).



Tanga igitekerezo kuri iyi nkuru



Igitekerezo