Ababyeyi  bafashwe bugwate n’Ibitaro bya Kabutare, batunzwe n’ibiryo abandi bamennye

Ku bw’Impamvu zo kubura ubwishyu bwo kwishyura nyuma yo kubyarira mu Ibitaro bya Kabutare biherereye mu Karere ka Huye ,aba babyeyi biganjemo ababyaye bakiri bato bavuga ko aho mu bitaro batemerewe kuharenga kuko bashyiriweho aba bacunga ngo badacika.

Aba babyeyi ngo bamaze muri ibi Bitaro bya Kabutare igihe gitandukanye kuva mu kwezi kwa Gatanu n’ukwa Gatandatu nk’uko babivuga.

Umwe ati’’Nahageze njye kubyara mu kwezi kwa 5,naraje ndabyara nyine mbura ubwishyuza kubera bamfunze nauze uko ntaha’’

Undi ati’’Naje ahangaha i Butare ,naje gukorera amafaranga umuhungu antera inda mpita nza hano mu bitaro njye kubyara,mbura amafaranga nyine ngumamo hano’’

Uyu ashimangira ko aho bari muri ibi bitaro batemerewe gusohoka kuko bafite abantu babacunga .

Undi avuga ko yageze muri ibi bitaro tariki ya 22 z’ukwezi kwa Gatandatu akaza kubyara adafite Mituelle ngo kuva icyo gihe ameze nk’ufunzwe kuko no kujya ku bwiherero abasekirite babacunga.

Ngo kutemererwa kurenga imbibi z’ibitaro ngo bituma abana b’aba babyeyi kugeza magingo aya ntawe urabona urukingo na rumwe kandi mu bitaro nta serivisi zo gukingira zihakorerwa.

Ku bijyanye no kuryama ngo aba babyeyi bavuze ko barara hanze kuri sima imvura yagwa ikahabasanga .Ku bijyanye no kurya ngo hari igihe abandi bazaga kumena ibiryo basigaje bakaba aribyo bayora bakabirya.

Bakomeza bavuga ko iyo ibi biryo batoragura bitabonestse ngo babwirirwa bakanaburara.

Umuyobozi w’Ibitaro bya Kabutare, Dr Jean Bosco Nzambimana, avuga ko atari ukubafungirana ahubwo ibitaro biba bitegereje ko bishyura nk’uko baba babibijeje kandi ngo iyo babuze ubwishyura barabarekura bagataha.

Naho ku bijyanye n’aba bana babo batarafata n’urukingo na rumwe,uyu muyobozi avuga ko ntakibazo umwana yagira igihe cyose yarufatira.

Impamvu nyamukuru y’iki kibazo ngo ni uko abenshi muri aba babyeyi nta bwisungane mu kwivuza bafite ndetse n’abandi bakaba badashoboye kwiyishyurira.

Radio/TV1 dukesha iyi nkuru ikaba yatangaje ko hari amakuru ifite avuga ko Umunyakakuru wayo akimara kuva muri ibi bitaro ejo ku wa Kabiri tariki 19 Nzeri 2017, aba babyeyi n’abana babo bahise barekurwa.

Ikibazo cy’abarwayi bafatwa bugwate n’ibitaro byo hirya no hino mu gihugu kubera kubura ubwishyu bwa serivisi baba bahawe si gishya akenshi bakarekurwa ari uko itangazamakuru ribishyize ahagaragara.

Mu mwaka wa 2016 , Minisiteri y’Ubuzima(Minisante) yamaganye ibi bikorwa ivuga ko nta mabwiriza yigeze iha ibitaro yo kugwatira abarwayi babuze ubwishyu nyuma yo kuvurwa.

Gabriel Habineza/Umubavu.com



Tanga igitekerezo kuri iyi nkuru



Igitekerezo