Ukuri ku Munyemari w’Umugande   bivugwa ko yashimutiwe mu Rwanda  n’abantu bitwaje intwaro

Umunyemari uzwi cyane ku mupaka wa Katuna mu majyepfo ya Uganda yashimuswe n’abantu bitwaje intwaro bataramenyakana ubwo yari mu Rwanda amaze kubitsa amafaranga muri Banki ya Kigali ishami rya Gatuna riri mu Ntara y’Amajyaruguru mu Karere ka Gicumbi ariko Polisi y’u Rwanda yahakanye aya makuru.

Justus Tweyogyere batazira Mwana Muto akora akazi ko kuvunja amafaranga ku mupaka wa Katuna akaba asanzwe ari umuturage wo mu Mujyi wa Katuna ho mu Karere ka Kabale muri Uganda.

Umyobozi w’ihuriro ry’abavunja amafaranga ku mupaka wa Katuna , yahamije ko Tweyogyere yashimuswe ejo ku wa Mbere tariki 20 Ugushyingo 2017 mu ma saa munani z’amanywa ubwo yari ku ruhande rw’u Rwanda.

Umuyobozi w’Umujyi wa Katuna ,Nelson Nshangabasheija yavuze ko Tweyogyere yashimuswe n’abantu bitwaje intwaro bataramenyekana ubwo yari amaze kubitsa muri Banki ya Kigali Ishami rya Gatuna amafaranga y’u Rwanda agana na Miliyoni 40 ni ukuvuga Miliyoni 170 z’Amashilingi ya Uganda.

Chimpreports dukesha iyi nkuru ivuga ko Nshangabasheija ashimangira ko Tweyogyere akimara gushimutwa yamuhamagaye kuri Telefone atabaza asaba ubufashe ariko ngo nyuma y’iminota mike telefone yahise iva ku murongo aho yahise ageza iki kibazo kuri Polisi ya Katuna.

Uyu muyobozi yongeyeho ko uwitwa Zadoki Kagyeera, ukuriye polisi ikorera ku mupaka wa Katuna, ndetse n’abayobozi baturutse mu biro by’urwego rushinzwe Ubutasi mu Gisirikare cya Uganda (CMI) muri Katuna, bagerageje kwambuka umupaka ngo binjire mu Rwanda bajye kureba icyabaye, ariko bakangirwa n’inzego z’umutekano z’u Rwanda ku mupaka.

Iki kinyamakuru kivuga ko Umuyobozi w’igipolisi cya Uganda mu Karere ka Kabale, Dickens Bindeeba, avugaga ko iki kibazo bari kukivuganaho n’abayobozi b’igipolisi cy’u Rwanda kugirango gikurikiranwe.

Umuvugizi w’Igipolisi cy’u Rwanda ,ACP Theos Badege yasobanuye ko polisi yamusanze aho yari ikamusaba ibisobanuro by’ukuntu yinjije mu Rwanda akayabo ka miliyoni 40 atabimenyekanishije nk’uko amategeko abigena.

Yavuze ko amategeko ya Banki Nkuru y’u Rwanda agena ko umuntu ugiye kwinjiza mu Rwanda amafaranga asaga 10 000 by’amadorali abivuga kuri gasutamo.

Ati “Baramubajije bati ko utubahiriza amategeko ? Nawe ati ‘aya mafaranga ni ayo nkoresha mu kazi kanjye k’ubuvunjayi . Bati ‘Uvunja he se ?’ Ati ‘mbitsa hano amanyarwanda, bagenzi banjye b’i Kigali bakampa amadorali tugakora ubucuruzi hagati ya Kabale, Gatuna na Kigali.”

Bamusabye inyemezabwishyu zerekana ko we n’abo bakorana bohererezanya amafaranga arazibura, ajyana na polisi i Kigali kubareba.

ACP Badege avuga polisi yamukekagaho kwinjiza amafaranga mu buryo bwa magendu, ariko igasanga akora ibyemewe, BNR ikaba yarasabye abo bakorana kuzajya bamwaka inyemezabwishyu na we akamenyesha gasutamo ko yinjije amafaranga menshi mu gihugu.

Tweyogyere yabwiye IGIHE ko polisi itigeze imufunga ahubwo ko yamwegereye ikamwaka ibisobanuro yamara kubitanga ikamusaba ko yamutwara imusubiza i Gatuna akavuga ko bitari ngombwa, agatega agasubira mu kazi ke nk’uko bisanzwe.

Ahamya ko atigeze ahutazwa na gato kandi ko n’ibyo yasabwe gukosora agiye kubikurikiza.

Amabwiriza yo ku wa 1 Ukwakira 2017 y’Ishami rishinzwe Iperereza ku Mari yerekeye imenyekanisha ry’amafaranga ku mupaka agena ko ingano y’amafaranga cyangwa agaciro k’impapuro mvunjwafaranga byemerewe kuvanwa cyangwa kwinjizwa ku butaka bw’u Rwanda nyirabyo atarinze kubimenyekanisha ari amadolari y’Amerika atarenga ibihumbi icumi (10.000 USD) cyangwa iyo ngano mu bundi bwoko bw’amafaranga.

Umuntu uwo ari we wese winjiye mu Rwanda cyangwa wifuza gusohoka mu Rwanda agendanye amafaranga cyangwa impapuro mvunjwafaranga birengeje uwo mubare agomba kubimenyekanisha ku mukozi ubifitiye ububasha.

Imenyekanisha rikorerwa ku rupapuro rw’imenyekanisha ruboneka ku mukozi ubifitiye ububasha ukorera ku mupaka, ku kibuga cy’indege no ku cyambu.



Tanga igitekerezo kuri iyi nkuru



Igitekerezo
Mathew Kuya 21-11-2017

Urabona kayumba nacha mumashyaka arwanya museveni biza mworohera ariko turitayari kuko natwe ntabwo turasa amashaza

Mathew Kuya 21-11-2017

Unva mbabwire iki kinyamakuru cyandika izinkuru umenya gifitanye isano ni shyaka rya kayumba na bagenzibe.babuze aho batera baturutse none barakora ibishoboka ngo baduteranye kugirango babone aho batera baturutse kuko basanze Congo ibarusha ubusambo