Gicumbi : Abasaza n’abakecuru  batishoboye  bakoreshwa imirimo ivunanye

Bamwe mu bageze mu zabukuru batishoboye bafite imyaka 80 y’amavuko kuzamura bo mu karere ka Gicumbi bahangayikishijwe n’uko bakoreshwa imirimo y’amaboko muri VUP kandi bafite imbaraga nke. Bagasaba ko bahabwa inkunga y’ingoboka ihabwa abasaza n’abalecuru batishoboye.

Bamwe muri aba basaza bo mu Murenge wa Manyagiro baganiriye na Radio/TV1 dukesha iyi nkuru bavuga ko nta mbaraga bafiye ndetse nta n’abana bafite babasimbura muri iyi mirimo bakora amaterasi.

Umwe muri bo ufite imyaka 86 y’amavuko avuga ko yashyizwe muri iyi mirimo ya VUP muri uyu mwaka aho avuga ko ubwe adashoboye ndetse mu rugo iwe akaba nta muntu ushoboye bityo ko abikora ari ukubura uko agira.

Undi avuga ko yahawe amafaranga y’ingoboka incuro ebyiri nyuma akaza gukurwa mu bayahabwa abwirwa ko afite abana gusa avuga ko aba bana bavuga ari imfubyi ndetse bakaba n’abanyeshuri bityo ko atakura abanyeshuri mu ishuri ngo baze bamusimbure mu mirimo ya VUP.

Aba basaza kandi bashimangira ko kugira ngo umuntu ajye ku rutonde rw’abahabwa inkunga y’ingoboka bisabwa ko hari akantu uha abayobozi.

Icyifuzo cy’aba baturage ngo ni uko ubuyobozi bwabafasha bakajya bahabwa inkunga y’ingoboka aho gukora imirimo badashoboye kandi batanafite uwayibafashamo.

Ku ruhande rw’ubuyobozi bw’akarere ka Gicumbi, Nkurunziza Safara umukozi w’akarere ushinzwe imibereho myiza y’abaturage avuga ko iki kibazo batari bakizi ariko ngo bagiye kugikurikirana abakora imirimo y’ingufu muri VUP kandi bashaje bashakirwe ubundi bufasha.

Ubusanzwe amafaranga y’ingoboka ntahabwa umuntu ku giti cye ahubwo ahabwa umuryango nawo uri mu cyiciro cya mbere cy’ubudehe, kandi ukaba nta muntu uwurimo ufite hagati y’imyaka 18 na 64 y’amavuko ushoboye gukora.

N’ubwo hari aho usanga hari umryango uba ugizwe n’abageze mu zabukuru gusa kandi bari mu cyiciro cya mbere cy’Ubudehe kandi ntawe ushoboye gukora uwurimo.



Tanga igitekerezo kuri iyi nkuru



Igitekerezo