Menya zimwe mu mpamvu zishobora gutera ubugumba n’uburyo zakwirindwa

Ubugumba ni kimwe mu bibazo bikomeye byugarije imiryango y’abatuye isi aho usanga bwibasira abashakanye bityo kigatera ingorane zikomeye hagati yabo ku buryo hamwe unasanga bitera intonganya za buri munsi ndetse no gusenyuka kw’ingo zimwe na zimwe cyane ko burya buri umuryango uba wifuza gubyara ugaheka. Ubugumba rero bushobora guturuka ku mugore cyangwa ku mugabo bityo mu gihe bibayeho bikaba ari inshingano za buri wese mu gushakira umuti iki kibazo aho kwitana bamwana.

Iki kibazo akenshi usanga gikunze kugaragara ku bagore kurusha abagabo. Ku bagore ubugumba burimo amoko abiri : ubugumba bwa mbere bubaho igihe umugore atigeze asama na rimwe cyangwa yarabyaye rimwe agahita agumbaha burundu, naho ubugumba bwa kabiri bukaba ari igihe noneho umugore akunze gukuramo inda.

Aha rero ngo ni byiza ko umugore amenya igitera bumwe muri ubu bugumba, akihutira kujya kwa muganga bakamurebera ikibitera. Izi ni zimwe mu mpamvu zishobora gutera ikibazo cy’ubugumba cyangwa kutabyara hagati y’abashakanye :

Imihindagurikire y’ukwezi k’umugore

Hari abagore bafite ukwezi guhindagurika. Akaba atabasha kumenya igihe imihango izira kuko ukwezi kwe guhindagurika cyane. Hakaba ubwo imihango ije muri uku kwezi ubundi hagashira andi mezi abiri ntakintu arabona. Niba uri umugore ukaba ufite ukwezi kuri munsi y’iminsi 21 cyangwa kurenza iminsi 35 ,ugomba kwihutira kwa muganga akakugira inama y’uburyo wabyifatamo kuko bishobora kukiviramo gutinda kubona urubyaro.

Kuziba kw’imiyoborantanga

Hari n’igihe umugore ashobora kuba yarazibye imiyoborantanga, aho usanga kimwe cya kane cy’abagore baba ingumba kubera iki kibazo,bityo ngo gusama bikaba bidashoboka kuko intangagabo zibura aho zinjirira. Gusa ngo birashoboka ko intanga ngabo n’intanga ngore bihurira hanze y’umura ibi rero bikaba bitera kuba umugore yasamira inyuma y’umura.

Intanga ngore z’ibihuhwe

Hari ubwo umugore ashobora kuba ingumba kubera ko adafite intanga ngore cyangwa se igihe azifite ariko ari ibihuhwe, muri iki gihe ngo bishoboka ko umugore bamutera intanga hanyuma zigahuzwa n’iz’umugabo.

Ururenda

Ikindi gishobora gutuma umugore aba ingumba ni igihe ururenda rwe rudashobora gufasha intanga ngabo kwihuta ngo igere mu murerantanga. Aha rero ngo bashobora guhuza intanga ngore n’intanga ngabo ku buryo bwa gihanga ku buryo zizatanga umwana.

Indwara

Hari indwara zimwe na zimwe zatera iki kibazo. Ingero batanga ni:Diyabete, Umwingo,indwara z’ibyuririzi za canseri,..Niba ubona warabuze urubyaro kandi hari indwara imwe muri izi waba urwaye,cyangwa indi ukeka ko yaba ibitera,banza uzivuze zikire neza ntakabuza uzatwita kandi wibaruke ntakibazo.
Izindi ni indwara zandurira mu mibonano mpuzabitsina zitavuwe neza nazo zishobora gutuma imiyoborantanga yifunga .

Ibiro

Indi mpamvu nkuko tubikesha urubuga tomberenceinterapidement.fr, umuntu unanutse bikabije cyangwa ubyibushye kuburyo burenze ibikenewe ashobora kubura urubyaro. Uku kunanuka cyangwa kubyibuha cyane bituma habaho guhindagurika mu misemburo ye.

Ikindi gishobora gutuma utabyara ni ugukora imyitozo ngororamubiri ikabije cyangwa se imirire mibi.

Abagabo nabo bashobora gufatwa n’ubugumba

Nkuko twabivuze hejuru si abagore gusa bagira ibibazo byatuma abashakanye batabyara. Umugabo nawe ashobora kuba afite ikibazo bikaba byatuma adatera inda. Ni byiza ko rero umuryango ufite iki kibazo ujya kwa muganga:Umugabo n’umugore bakabapima. Iyo basanze umugore afite ikibazo cyavurwa bigakira biba ari amahire.

Ariko hari n’igihe umugore ashobora kuba ntakibazo afite ahubwo umugabo ariwe ufite ikibazo. Icyo gihe bapima intanga ze bakareba ko zifite ingufu zo gutera inda. Indi ndwara ikunda kuba ku bagabo ni prostate.Iyi ndwara iyo umugabo ayirwaye ntashobora kubyara,aba ari ingumba.

Muri rusange, haba hagomba gushira amezi runaka kugira ngo umugore n’umugabo babana babyare, umugore rero afite amahirwe 25% yo gusama muri buri gihe cye cy’uburumbuke. Igihe rero umugore abonye amaze imyaka 2 atarasama ngo ni byiza ko ajya kwa muganga, gusa ngo hari n’ubwo uku gutinda biterwa n’imyaka umugore agezemo aho ngo usanga abagore bafite kuva ku myaka 35 kuzamura batinda gusama.

Ushobora kwibaza niba ubugumba bwavurwa bugakira ?

Ubugumba ni ikibazo gishobora kuvurwa kigakira bitewe n’impamvu ibitera muzo twabonye. Ariko hari n’igihe impamvu ibitera itabasha kuvurwa. Bisaba kuba hafi umuntu wahuye n’iki kibazo kuko ariyanga akumva ntagaciro afite mubandi. Ntagomba guhezwa, kumubwira amagambo akomeretsa ahubwo bisaba kumuba hafi kugira ngo bitamwongerera kwiheba.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo
Poetus Kuya 20-10-2017

Ibi nibyiza kubimenya birafasha benshi kwitabira kumenya uko bahagaze no kubungabunga ubuzima bwabo ari nako baburinda