Visi Perezida wa Guinee Equatoriale yakatiwe igifungo n’urukiko rwo mu Bufaransa

Rumwe mu nkiko zikorera mu gihugu cy’u Bufaransa rwakatiye Visi Perezida w’igihugu cya Guinee Equatoriale, Teodorin Obiang gupfungwa imyaka itatu azira kunyereza umutungo wa Leta gusa ntazajyanwa mu gihome ahubwo akazajya acungishwa ijisho.

Obiang w’imyaka 48 ni umuhungu wa prezida w’igihugu cya Guinee Equatoriale kibarizwa muri Afurika y’Uburengerazuba. Uyu mugabo bivugwa ko asanzwe afatwa nka rurangiranwa kubera uburyo yifata nk’umuntu w’ikirenga udasanzwe cyane ko ngo atunzwe n’agatubutse ariko bivugwa ko asahura Leta.

Teodorin Obiang ntiyari muri rukiko ubwo yahamwaga n’ibyo aregwa birimo kunyereza umutungo w’igihugu byitwaje icyo ari cyo. Nyuma yo guhamwa n’icyaha, imitungo yose uyu mugabo afite mu Bufaransa izahita ifatirwa. Iyi mitungo ikaba irimo inzu bivugwa ko ari igitangaza iherereye mu gace ka Avenue Foch mu mugi wa Paris. Uyu mugabo kandi yanaciwe kandi ihazabu ya miliyoni zisaga 30 zose z’ama Euro.
Obiang yashinjwaga gukoresha amafranga ya Leta mu kwinezeza aho yajyaga kurira ubuzima mu mugi wa Paris mu gihugu cy’u Bufaransa.

Mu mitungo uyu mugabo yaguze muri ayo mafaranga harimo amazu agezweho afite agaciro karenze amadolari miliyoni 100, ubwato bugezweho bufite uburebure bwa metero 76, imodoka nyinshi zigezweho nka Bugatti, Ferrari na Rolls Royces.

PNG - 994.6 ko
Teodorin Obiang azwiho kurya ubuzima cyane

Ababashinzwe iperereza mu Bufaransa bahise bamutegeka gusubiza imitungo yanyereje irimo inzu ifite agaciro ka miliyoni 30 z’amadolari iri mu mugi wa California mu gace umuhanzi nyakwigendera Michael Jackson yabagamo.

Ise w’uyu mugabo, Teodoro Obiang Nguema ari ku butegetsi kuva mu mwaka wa 1979 kandi ni nawe Perezida wo ku mugabane wa Afrika umaze imyaka myinshi ku butegetsi.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo