Umutwe wa Hamas urahamagarira  Abanyapalesitina kwigaba mu mihanda kubera icyemezo cya Trump

Nyuma yuko Donald Trump, Perezida wa Leta Zunze ubumwe za Amerika yemeje Yerusalemu nk’umurwa mukuru w’igihugu cya Isirayeli, umukuru w’umutwe w’Abanyapalesitina ugendera ku matwara akaze y’Idini akaze ya Isilamu wa Hamas, Ismail Haniyeh arahamagarira Abanyapalesitina gutangira imyivumbagatanyo mishya ya infifada.

Abaturage ba Palesitina basabwe guhagarukira rimwe bakarwanya icyemezo cya Perezida Trump cyo kwemera ko Yeruzalemu ari umurwa mukuru w’igihugu cya Isiraheli.

Ismail Haniyeh ibyo yabivugiye mu kiganiro yagiranye n’abanyamakuru mu ntara ya Gaza.

Ministri w’intebe wa Israheli, Benjamin Netanyahu, yavuze ko Leta ye irimo kuvugana n’ibindi bihugu ariko atavuze izina byiteguye gufata icyemezo nk’icyafashwe na Perezida Trump.

Habaye ibikorwa byo gukozanyaho hagati y’ingabo za Isiraheli n’Abanyapalesitina mu mijyi ya Yeruzalemu na Betelehemu aho igipolisi cyarashe ibyuka biryana mu maso.

Trump yemeje Yerusalemu nk’umurwa mukuru wa Isirayeli mu ijambo yavugiye muri White House ku munsi wa gatatu tariki ya 06 Ukuboza 2017. Icyemezo muri rusange cyakomeje kwamaganwa hirya no hino ku isi.

PNG - 486.6 ko
Trump yemeza Yerusalemu nk’umurwa mukuru wa Isirayeli


Mu bacyamaganye harimo ibihugu bisanzwe ari inshuti za Amerika nk’u Bwongereza, u Bufaransa na Arabia Saudite.

Daniel MUKESHMANA/Umubavu.com



Tanga igitekerezo kuri iyi nkuru



Igitekerezo