Ubwato bwari butwaye abantu 251 bwaburiwe irengero muri Philippines

Ubwato bwari butwaye abantu bagera kuri 251 bwaburiwe irengero nyuma yuko bwibiriye ku nkengero yo mu burasirazuba bw’igihugu cya Philippines nkuko bitangazwa n’ushinzwe kugenzura ako gace.

Umuvugizi w’ushinzwe kugenzura agace kaburiyemo ubu bwato, yavuze ko hari abantu bivugwa ko bapfuye nyuma yaho ubwato bwibiriye kubera imiyaga ikomeye.
Amakuru avuga ko amato yo muri ako karere yatabaye abantu bari muri ubwo bwato hafi y’ikirwa cya Polillo.

Amato y’abatabazi afatanyije na kajugujugu zoherejwe muri ako Karere kibasiwe n’ikirere kibi nkuko ubutegetsi bw’igihugu bubitangaza.

PNG - 781.8 ko
Amato yahise atangira ibikorwa by’ubutabazi


Kuri ubu hamaze kuboneka imirambo ine mu gihe hari abandi bantu benshi barokowe nkuko itangazamakuru ryaho ryavuze.

Umuvugizi w’ugenzura inkengero zabereyemo iyi mpanuka y’ubu bwato, Armand Balilo yavuze ko bakirimo babarura abantu bahagiriye ibyago.

Armand yagize ati "Twemeza ko ahanini ikirere aricyo cyateye iyi mpanuka kuko ubwato bufite ubushobozi bwo gutwara abantu 280 kandi ntibwari bwanapakiwe kurenza urugero.”

Umukozi wo mu kigo cyo gutabara, Juanito Diaz, yavuze ko hari amakuru avuga ko ubwo bwato butavuzwe izina bwari bufite umwenge bityo ko bishoboka ko nayo yaba ari impamvu yaba yatumye bwibira.

Impanuka z’amato zikunze kuba mu gihugu cya Philippines bitewe nuko hakunze kugwa imvura nyinshi.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo