USA : Hadutse inkongi y’umuriro yatwitse ahantu hararuta umujyi wa New York City

Umuriro ukomeye cyane wiswe Thomas wadutse muri Leta ya California (ikunze kwitwa, The Golden State), imwe muri Leta zigize Leta Zunze Ubumwe za Amerika, kuri ubu uyu muriro ukaba ukomeje kwiyongera ku buryo bukomeye ndetse aho watwitse hakaba haruta umujyi wa New York wose.

Umuriro wiswe Thomas mu majyepfo ya Leta ya California, mu duce twa BVentura na Santa Barbara wafashe ubuso bungana na hegitari zisaga 230.000 mu cyumweru gishize.

Kubera kwenyegezwa n’inkubi y’umuyaga, inkongi yakwiriye ahantu henshi ku buryo wabaye uwa gatanu ukomeye mu mateka ya Leta ya California nyuma yo gukwira ku butaka bungana na hegitari 50.000 mu gihe cy’umunsi umwe gusa.

Abatuye mu duce twegereye inkombe bategetswe kwimuka byihuse. Amafoto yafashwe n’icyogajuru yererekana uyu muriro wiswe Thomas mu gace k’amajyaruguru ya Los Angeles ukagera no ku nkombe y’inyanja ya Pasifika.

Ku munsi wo ku Cyumweru, abakora mu rwego rwo kuzimya inkongi bavuze ko 15% by’ahahiye hazimijwe ariko baje kugabanya bashyira ku 10% mu gihe umuriro ukomeje gusakara.

Umuyobozi wa polisi muri Santa Barbara, Bill Brown, yagize ati “Uyu muriro urakaze, biraboneka, ariko dufite abantu benshi bari gukorana umurava mu kuwuzimya."
Ibikorwa byo kuzimya umuriro biri gukomwa mu nkokora n’inkubi y’umuyaga. Ntibyoroshye kubera uduce tw’imisozi.

PNG - 683.4 ko
Abazimya umuriro bafite akazi katoroshye kubera umuyaga


Umusesenguzi mu rwego rwo kuzimya inkongi muri California, Tim Chavez, yavuze ko ibikorwa by’ihutirwa byakomwe mu nkokora kubera ko ubushyuhe buri guhura n’inyanja bigatuma bigorana kuhagera.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo