Somalia : Leta yahaye gasopo abitwikira ijoro bakinjiza amakamyo mu mugi wa Mogadishu

Nyuma y’ibitero bibiri biherutse guhitana abantu benshi mu mujyi wa Mogadishu kandi bikaza kugaragara ko hari abitwaza amakamyo bakabitegamo, Leta ya Somalia yafashe icyemezo cyo kubuza amakamyo kwinjira muri uyu mujyi cyane cyane mu gihe cyo ku manywa.

Leta ya Somalia yavuze ko yizeye ko iki cyemezo kizatuma umutekano urushaho gucungwa neza muri iki gihe abantu bakomeje kuwucyemanga.

Abayobozi bo hejuru babiri bashinzwe umutekano birukanywe ku kazi nyuma yaho ku itariki ya 28 z’uku kwezi nyuma y’aho igitero gihitaniye abantu bagera kuri 27.
Ikindi gitero cyagabwe hashize ibyumweru bibiri cyahitanye abantu barenga 350 muri uwo mujyi.

Iki gitero cyagabwe ku itariki ya 14 z’ukwezi kwa cumi, cyabaye icya mbere mu guhitana abantu benshi mu mateka ya Somalia cyagabwe hakoreshejwe ikamyo yari yatezwemo ibintu biturika.

Umukuru w’umujyi wa Mogadishu, Thabit Abdi, yatangaje ko amakamyo atemerewe kunyura muri uwo mujyi hagati ya 07:00 na 20:00.

Abazanyuranya n’iki cyemezo ngo bashobora guhanishwa ihazabu ingana n’amadolari igihumbi.

Leta ya Somalia ivuga ko icyo gitero cyo ku itariki ya 14 z’ukwa cumi cyagabwe n’umutwe ugendera ku matwara akaze y’idini ya Islamu wa Al Shabaab.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo