Mu mateka ya Arabie Saudite abagore bagiye guhabwa imirimo yo gutwara imodoka

Mu mateka y’Ubwami bw’igihugu cya Arabia Saudite, abagore hari imirimo imwe n’imwe batemerewe gukora ariko kuri ubu bigenda biba amateka dore ko mu mwaka ushize aribwo Ubwami bw’iki gihugu bwemeje ko abagore nabo bagiye kujya batwara imodoka nta nkomyi.

Nyuma y’iki cyemezo kuri ubu ibigo bya Uber na Careem bitanga serivisi zo gutwara abantu muri Arabie Saudite, byatangaje ko bigiye gutangira guha akazi abagore nyuma y’uko Ubwami bw’iki gihugu butangaje ko guhera muri Kamena uyu mwaka bazemererwa gutwara imodoka.

Ubusanzwe abashoferi bose b’ibi bigo bibiri bari abagabo gusa, biganjemo abo muri Arabie Saudite batwara imodoka zabo. Icyakora abakiriya babyo benshi bari abagore kuko nka Uber bangana na 80% naho Careem bakangana na 70%.

Muri Nzeri umwaka ushize nibwo Leta ya Arabie Saudite yakuyeho icyemezo cy’igihe kirekire cyabuzaga abagore gutwara imodoka bitewe n’imiyoborere ishingiye ku myemerere y’idini ya Islam icyo gihugu kigenderaho.

Ibi byatumye biriya bigo bibiri bitangira gutegura uko bizaha akazi abashoferi b’abagore, aho Careem yatangije amahugurwa y’iminota 90 mu mijyi nka Riyadh, Jeddah na Al Khobar, agamije guhugura abagore bo muri icyo gihugu baboneye impushya zo gutwara mu bindi bihugu.

Aya mahugurwa azigisha abagore amategeko y’umuhanda muri iki gihugu, uburyo bwo guha abakiriya serivisi n’ikoranabuhanga rikoreshwa n’icyo kigo. Careem ikorera mu bihugu 13 byo muri Aziya, Amajyaruguru ya Afurika na Pakistan, ifite umutungo ubarirwa muri Miliyari imwe y’amadolari ya Amerika.

Nkuko CNN ibitangaza, Umuyobozi Mukuru wa Careem, Abdullah Elyas, yavuze ko ku nshuro ya mbere bifuza gukoresha abagore mu kigo cyabo. Yongeraho ko Careem yamaze kwakira ibihumbi by’abagore basaba akazi ko gutwara.

Careem irateganya guha akazi abagore barenga 10 000 muri Kamena 2018. Elyas avuga ko bizasubiza ibibazo byinshi.

Yagize ati “Abashoferi b’abagore bazadufasha guha serivisi nziza abagore benshi bashaka kugenda ariko bakanga gutwarwa n’abagabo.”

Ikigo Uber nacyo cyatangaje ko gifite gahunda yo gufungura ahantu hazajya hatangirwa amahugurwa n’izindi serivisi zigendanye no guha abagore akazi ko gutwara imodoka.

Uber na Careem byizeye ko guha akazi k’ubushoferi abagore bizatanga umusanzu mu kugabanya umubare w’abashomeri babarirwa kuri 12.8% muri Arabie Saudite. Umushoferi wo muri Careem utwara imodoka iciriritse amasaha umunani ku munsi yinjiza hagati ya 1600 cy’amadolari na 2100 ku kwezi.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo