Misiri yanenze icyemezo cy’Amerika cyo gufatira inkunga yari yarayigeneye

Igihugu cya Misiri cyanenze Leta Zunze Ubumwe za Amerika nyuma yaho bivugwa ko zafatiriye inkunga mu bya gisirikare ifite agaciro ka miliyoni 195 z’amadolari ndetse zigahagarika n’indi nkunga ingana na miliyoni 96 z’amadolari cyari cyarageneye Misiri.

Amerika ivuga ko yafashe icyo cyemezo kubera impungenge ku iyubahirizwa ry’uburenganzira bwa muntu mu rigaragara mu gihugu cya Misiri.

Itangazo rya minisiteri y’ububanyi n’amahanga ya Misiri rivuga ko icyemezo cy’Amerika, kitaratangazwa ku mugaragaro, kigaragaza kudashyira mu gaciro nkuko bigaragara mu nkuru BBC yatangaje.

Minisitiri w’ububanyi n’amahanga wa Misiri, Sameh Shoukry yasubitse inama yari kugirana na Jared Kushner, umukwe wa Perezida Donald Trump, perezida wa Amerika.

Abategetsi b’Amerika bavuze ko batishimiye ko Perezida wa Misiri aherutse gushyira umukono ku itegeko rishya rigenga imiryango itegamiye kuri leta.

Iryo tegeko rivuga ko imiryango itegamiye kuri leta ibujijwe gukora ibikorwa ‘’bibangamira umutekano w’igihugu, umudendezo w’abaturage, imigenzo iboneye y’abaturage cyangwa ubuzima bw’abaturage".

Iryo tegeko kandi rigenzurira bya hafi abatera inkunga iyo miryango itegamiye kuri leta, ndetse rigaha leta ububasha bwo kugenzura ibikorwa by’iyo miryango itegamiye kuri leta.

Havugimana P



Tanga igitekerezo kuri iyi nkuru



Igitekerezo