Minisitiri yeguye ku mirimo ye kubera filimi z’urukozasoni

Nyuma yuko, Damian Green, umwe mu ba Minisitiri bagize Guverinoma y’Igihugu cy’u Bwongereza, yemeye ko mudasobwa yakoreshaga mu biro bye yigeze gusangwaho amafoto n’amashusho bya filimi z’urukozasoni, kuri uyu wa gatatu, yeguye ku mirimo ye.

Mu 2008 nibwo Polisi yabonye aya mafoto kuri mudasobwa ya Green, icyo gihe hakorwaga iperereza ngo hamenyekane uwaba akomeje gushyira ku karubanda amabanga ya guverinoma.

Ibiro bya Minisitiri w’Intebe, Theresa May, byatangarije CNN ko ariwe wasabye Green kwegura, aho yavuze ko ibyo yakoze bihabanye n’amahame agenga imyitwarire y’Abaminisiti b’u Bwongereza, ndetse n’amabwiriza arindwi agenderwaho n’abari mu myanya y’ubuyobozi.

PNG - 482.8 ko
Damian Green weguye azira filimi z’urukozasoni


Ati “Ni n’akababaro kenshi, ndetse ngushimira umusanzu watanze mu gihe cy’imyaka myinshi, nagusabye kwegura muri guverinoma ndetse nkaba nakiriye kwegura kwawe.”

Mu gusubiza May, Green yongeye kuvuga ko atigeze akura kuri Internet, cyangwa ngo arebe amashusho y’urukozasoni yari kuri mudasobwa ye yakoreshaga mu Nteko Ishinga Amategeko, ahamya ko nubwo ibyo ashinjwa bidafite ishingiro kandi bibabaje, atigeze yisobanura neza igihe byatangazwaga.

Ati “Ndemera ko nakabaye narabisobanuye neza mu itangazo rigenewe abanyamakuru ko mu 2008 polisi yaganiriye n’abanyunganira mu mategeko ku bijyanye n’amashusho y’urukozasoni yari kuri mudasobwa yanjye, ndetse ko mu 2013 polisi yongeye kubinganirizaho kuri telefoni. Ndasaba imbabazi ko natangaje amakuru ayobya abantu.”

Uretse ibijyanye n’aya mashusho kandi umunyamakuru witwa Kate Maltby yari aherutse gutangaza ko ubwo bari mu nama mu 2015 Green yaba yaramusabye ko baryamana, iki kirego ariko ntikigeze gifatirwa umwanzuro.

Green aje akurukira Sir Michael Fallon wari Umunyabanga wa Leta Ushinzwe ingabo weguye mu Ugushyingo 2017, kubera imyitwarire mibi ifite aho ihuriye n’ubusambanyi.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo