Kuva mu 1953 Abaperezida ba Koreya zombi bahuriye mu biganiro by’amateka

Kuva intambara ya Koreya (1950-1953) yarangira nibwo bwa mbere abakuru ba Koreya zombi bahuye bakaganira. Mbere ya 1953 ibi bihugu byombi byahoze bikoze igihugu kimwe. Uyu munsi Moon Jae-in wa Koreya y’epfo na Kim Jong Un wa Koreya ya ruguru bahuriye ku mupaka w’ibihugu byombi bahana ibiganza baraganira, uwa ruguru asura abo hepfo mu nama igiye guhuza ibihugu byombi.

Perezida Kim yabwiye abanyamakuru ko yizeye ko ari bugirane ibiganiro byiza mu mwuka wa kivandimwe na mugenzi we Moon. Niko byagenze ubwo bari bakibonana, ku maso bombi bari bishimye ubwo bahuriraga neza neza ku mupaka w’ibihugu byombi.
Mu mezi make ashize imvugo ya Koreya ya ruguru yumvikanagamo umwuka w’intambara ariko guhura mu ntangiriro za Mata, 2018 ubu byarahindutse haravugwa amahoro.
Abari aho bariya bakuru b’ibihugu bahuriye bavuga ko Perezida Moon yahaye ikaze mugenzi we ngo yambuke umupaka ugabanya ibihugu byombi uri mu gace kabatandukanya kagenzurwa cyane n’ingabo, nuko arambuka bajya n’ahagomba kubera ibiganiro.

Ibiganiro birambuye birabera mu nzu yiswe iy’amahoro(Peace House) iri ahitwa Panmunjom, muri ka gace katarangwamo ibikorwa bya gisirikare ku mupaka w’ibihugu byombi.

Perezida wa Koreya ya ruguru yanditse mu gitabo cy’abashyitsi ko guhura na mugenzi we Moon ari intangiriro y’amateka mashya hagati y’ibihugu byombi, amateka y’amahoro n’ubuvandimwe.

Mu mikino Olempiki iba mu bihe by’ubukonje yabereye muri Koreya y’epfo mu mpera za Werurwe nibwo hagaragaye bwa mbere ubushake bwo guhuza ibihugu byombi kuko byakoze ikipe imwe ibihagarariye byombi.

Amerika n’u Bushinwa byagize uruhare rukomeye mu guhuza ibi bihugu byombi.

Mu kwezi gushize Perezida Kim wa Korea ya ruguru yagiriye uruzinduko ruba gacye cyane i Beijing Bushinwa, bivugwa ko yahanogereje umugambi w’amahoro na Korea y’Epfo.

Mu kwezi gushize kandi umuyobozi wa CIA Mike Pompeo yasuye Pyongyang mu ruzinduko rw’ibanga, nawe bivugwako yari ajyanye ubutumwa bwo gusaba amahoro.
Pyongyang na Seoul kutumvukana kwabo mu bihe bishize kwashyiraga isi mu kaga kuko byageze aho abantu benshi kw’isi bibaza gusa igihe intambara iri butangirire.

Intambara ariko yari iteye inkeke cyane kuko ari intambara yari buhanganiremo ibihangange ku isi, USA n’inshuti zayo hamwe n’Ubushinwa n’inshuti zabwo. Intambara bamwe bemezaga ko yaba ari iya gatatu kw’isi kandi ikaza ari kirimbuzi kubera ubushobozi bw’intwaro bw’ibi bihangange.
Ngo aho inzovu zirwaniye hababara ibyatsi…Akaga kari kubona abanyantege nke none ubu AMAHORO ARI GUHINDA.

Reba hano Video ya ba Perezida ba Koreya zombi bahuye:


Travel for Free!


Tanga igitekerezo kuri iyi nkuru



Igitekerezo