Koreya ya Ruguru yarekuye imfungwa za Amerika zari zimaze imyaka n’imyaniko zarafashwe bugwate

Kuri uyu wa kane abagabo batatu Kim Dong Chul, Kim Hak Song na Kim San Duk bafite ubwenegihugu bwa Amerika bari barafunzwe na Korea ya ruguru, bageze muri Amerika ku kibuga cy’indege cya Andrew ho muri Maryland aho bahuye na Perezida Donald Trump.

Perezida Trump na Madamu we Melaniya, Visi Perezida Mike Pence na Madamu we Karen, umujyanama mu by’umutekano John Bolton, ndetse n’ushinzwe itangazamakuru Sara Sanders bose bakaba bahise basesekara kuri iki kibuga kuramutsa izi mfungwa.

PNG - 654.9 kb
Izi mfungwa zakiriwe n’abayobozi bakomeye ba Amerika barimo na Perezida Trump na Madamu we


Bamwe mu bayobozi bakomeye nka Minisitiri w’Intebe w’u Buyapani yafashe iki gikorwa cyo kurekura izi mfungwa nk’igikorwa cy’indashyikirwa kibaye hagati ya Amerika na Koreya ya Ruguru.

N’ubwo aba bagabo baje nta muntu n’umwe wo mu miryango yabo wemerewe kuba ari kuri iki kibuga cy’indege. Ibi ngo bikaba ari kubw’impamvu z’umutekano aho ngo aba bagabo bagomba guhita baganirizwa n’ibiro by’ubutasi ubundi bakabona gushyikirizwa imiryango yabo.

Igikorwa cyo kurekura izi mfungwa kibaye nyuma gato y’uruzinduko Umunyamabanga wa Amerika Mike Pompei yagiriye muri Koreya ya Ruguru ku munsi w’ejo akaba mbere yo kugenda yari yabwiye itangazamakuru ko ikibazo cy’imfungwa z’Abanyamerika ziri muri Koreya ari bugikomozeho.

Kurekurwa kw’izi mfungwa ni ikimenyetso cyiza Koreya ya Ruguru yeretse Amerika mbere yo guhura kw’Abaperezida b’ibi bihugu ndetse hakaba hari n’icyizere ko ibiganiro byabo bishobora kugenda neza.

PNG - 629.5 kb
Kim Dong Chul, Kim Hak Song na Kim San Duk barekuwe na Koreya ya Ruguru nyuma y’imyaka n’imyaniko barafashwe bugwate

Daniel MUKESHIMANA@Umubavu.com


Travel for Free!


Tanga igitekerezo kuri iyi nkuru



Igitekerezo