Burundi : Bafashwe barimo bagurisha umurambo w’umwana w’imyaka 4

Muri iki Cyumweru abagize ba nabi bagera kuri 5 bafatiwe mu ntara ya Cankuzo, bazira kwiba no kwica umwana w’imyaka ine witwa Devote Ndayisenga ukomoka muri Komine Mishiha bamuziza kuba yaravukanye ubumuga bwo kuba afite uruhu rwa nyamweru.

Nkuko tubikesha Indundi.com, uyu mwana yari yaraburiwe irengero kuva tariki 23 Werurwe, 2016 aho nta wari uzi aho yarengeye ndetse yari amaze kwibagirana.

Mu ijoro ryo kuri uyu wa Mbere tariki 09 Ukwakira 2017 nibwo aba bagize ba nabi batawe muri yombi aho barimo bagerageza kugurisha bimwe mu bice by’umubiri byasigaye by’uyu mwana dore henshi muri Afurika abafite uru ruhu babifashisha mu bikorwa by’uburaguzi n’ubupfumu.

Bidatinze aba bagize ba nabi barimo uwitwa Jean de Dieu Kwizera na Cyprien Miburo baturuka ku musozi wa Rwamvura, Siméon Nzoyihera uva ku musozi Humure, Sylvestre Ngayabosha na Jonas Banyiyezako baturuka ku musozi Saswe, muri Komine Kigamba bose bahise bagezwa kuri parike y’urukiko rukura rw’intara ya Cankuzo aho barimo bahatwa ibibazo n’umucamanza kuri ibi byaha, ubundi bakatirwe urubakwiye.

N’ubwo umubyeyi wa nyakwigendera adashobora kugarura umukobwa we wivuganywe kubera uko yavutse, yifatanije n’abaturage bose basaba ko ubutabera byakora mu buryo bw’intangarugero mu guhana aba bagize ba nabi kugirango bibera n’abandi urugero.

Twabibutsa ko nkuko amategeko y’u Burundi abiteganya mu gihe aba bagize ba nabi baba bahamwe n’icyaha bakatirwa igifungo cya burundu.



Tanga igitekerezo kuri iyi nkuru



Igitekerezo