Amerika yakuriye inzira ku murima iperereza rya CPI ku basirikari bayo

Leta Zunze Ubumwe za Amerika zanze ko Urukiko Mpuzamakungu Mpanabyaha (Court Penal International, CPI) rufite icyicaro mu Buholande gutangira iperereza ku basirikare bayo ku byaha baba barakoze muri Afuganistani.

Kuri uyu wa gatatu, icyegera cy’intumwa ya Amerika muri ONU, Michele Sison, yabwiye akanama ka ONU gashinzwe umutekano ko iperereza rya CPI ritagamije inyungu z’amahoro n’ubutabera muri Afuganistani.

PNG - 475 ko
Uyu ni Fatou Bensouda, umucamanza mukuru wa CPI


Ibi yabivuze mu gihe ako kanama karimo kiga ku bibazo bya Libiya na CPI, inama yarimo kandi Fatou Bensouda, uyoboye uru rukiko.

Sison avuga kandi ko Amerika yiyemeje kubahiriza ubutabera mpuzamahanga kandi ko Amerika ubwayo ifite ubutabera bukomeye, bwigenga kandi bwa mbere ku isi.

Mu ntangiriro z’ukwezi kwa cumi na kumwe, Fatou Bensouda yatangaje ko agiye gusaba abacamanza ba CPI kumuha uburenganzira bwo gushyira ahagaragara dosiye ku byaha byo mu ntambara bikekwa kuba byarakozwe n’abasirikare ba Leta Zunze Ubumwe za Amerika mu ntambara yo muri Afuganistani.

Mu gihe iperereza nk’iri ryaramuka ribaye bwaba bubaye ubwa mbere abasirikare ba Leta Zunze Ubumwe za Amerika bakurikiranwa n’uru rukiko rwa CPI.

Ku bwa Bensouda avuga ibyo byaha byo mu ntambara byakorewe mu ntambara muri Afuganistani n’abasirikare ba Amerika, ikigo cya Amerika gishinzwe iperereza ryo hanze y’igihugu, CIA, Abatalibani n’inshuti zabo hamwe n’abasirikare ba reta ya Afuganistani.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo