Afurika y’Epfo : Ubushyamirane bw’abashoferi b’amatagisi bwahitanye abagera ku 10 bose

Ku munsi w’ejo tariki ya 31 Ukwakira 2017, mu gihugu cya Afrika y’epfo mu ntara ya Kwazulu Natal, abantu bagera ku icumi bishwe n’urufaya rw’amasasu ubwo bamwe mu bashoferi b’amatagisi baminjaga amasasu kuri bagenzi babo.

Abarashwe bategewe mu muhanda mu gitondo cy’ejo ku wa kabiri ubwo bari mu itagisi igipolisi kikavuga ko byaba byatewe n’ubwumvikane buke buri hagati y’abatwara ayo matagisi ngo kuko ubushyamirane bwabo bumaze igihe buvugwa. Aya masasu yadutse saa moya za mu gitondo ku isaha yo mu mujyi wa Ladysmith.

Umuvugizi w’igipolisi gikorera muri aka gace, Col.Thembeka Mbhele yemeje aya makuru anavuga ko uru rufaya rw’amasasu rwahitanye abantu 10. Yavuze ko abapolisi bageze ahabereye ubu bwicanyi kandi ko imirambo y’abishwe yari ikiryamye aho.

Yavuze kandi ko uwungirije umukuru w’ishyirahamwe ry’abanyamatagisi yari kumwe n’abamurinda muri umwe mu mihanda minini ubwo imodoka ebyiri zitunguranye zadukaga zigatangira kurasa abantu batanu bari kumwe n’uyu muyobozi bakahasiga ubuzima.

Uwari utwaye imodoka ngo yananiwe kuyiyobora agongana na bisi ntoya, batanu bari bayirimo bose bagwa aho. Igipolisi cyavuze ko kitaramenya neza icyateye ibi ngo gusa iperereza ryo rirakomeje.

Intara ya Kwa Zulu Natal isanzwe izwiho ubushyamirane bw’abanyamatagisi barwanira ibyerekezo. Si ibi gusa kuko iyi ntara yanavuzwemo ubwicanyi bushingiye ku nyungu za politiki mu mezi ashize.

Guverinoma ya Afurika y’Epfo yashyizeho Komisiyo yo gukora iperereza kuri ubu bwicanyi igizwe n’abanyamategeko bakomeye.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo