Afurika y’Epfo : Bararirira mu myotsi nyuma yo guhatira umugabo gushyingurwa ari muzima bamuziza ko ari umwirabura

Abagabo babiri bamenyerewe mu mwuga w’ubuhinzi mu gihugu cya Afurika y’Epfo ari bo Theo Martins na Willem Oosthuizen bashyize umugabo mugenzi wabo witwa Victor Mlotshwa mu isandugu ishyirwamo umuntu wapfuye ku ngufu ari muzima bamuziza ko ari umwirabura none kuri ubu bararira ayo kwarika nyuma yo gukatirwa igifungo cy’imyaka 10 yose.

Nyuma yuko bashinjwe icyaha cyo gushaka kwica no guhotora, abagabo babiri Theo Martins na Willem Oosthuizen kuri ubu bamaze guhamwa n’ibi byaha byanatumye bahanishwa igifungo cy’imyaka 10.

PNG - 744.5 ko
Theo Martins na Willem Oosthuizen bahamijwe ibyaha byo kwica no guhotora


Aba bagabo bafashe Victor Mlotshwa baramuhondagura kugeza ubwo banamutegetse kwinjira mu isandugu isanzwe ijyamo abapfuye ngo bamuziza ko yanyuze ku butaka bwabo banamubwira ko arebye nabi bashobora no kumushyingura ari muzima.

Uru rubanza rw’aba bagabo ngo rwateye agahinda abantu benshi bo muri Afurika y’Epfo ndetse ngo binatera ubwoba bukomeye ko hashobora kongera kwaduka amacakubiri ashingiye ku ivangura ruhu by’umwihariko mu bahinzi bo muri iki gihugu.

Uyu mugabo, Mlotshwa wahatiwe kwinjira mu isandugu ari muzima yavuze ibyamubayeho nyuma y’aho hagaragariye video yabyo ku rubuga rwa YouTube nyamara hashize igihe kitari gito ibi bibaye.

Mu rukiko aba bagabo babiri bavuze ko batari bafite umugambi wo kubabaza Mlotshwa ubwo bamufataga mu kwezi kwa munani mu mwaka wa 2016 ko icyakora bashakaga kumwiyama gusa.

PNG - 555.8 ko
Victor Mlotshwa wategetswe kwinjira mu isandugu ijyamo abapfu ari muzima


Mlotshwa we yateye utwatsi ibyo aba babo bavuze ko bamuzizaga kunyura ku butaka bwabo avuga ko yari aciye mu nzira ya bugufi agiye kuri boutique aho yari atumwe na nyina we kumuhahira.

Ubwo aba bagabo babiri bari mu rukiko, umucamanza yabwiye urukiko ko bigaragara ko aba bagabo bashakaga kwivugana mugenzi wabo Victor Mlotshwa.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo