Ese koko Isirayeli na Palestine bizumvikana ari uko Yesu agarutse ?

Kuri iki cyumweru tariki ya 29 Ukwakira 2017 nibwo Jason Greenblatt, intumwa idasanzwe ya Reta Zunze Ubumwe za Amerika yari mu rugendo mu burasirazuba bwo hagati mu gihugu cya Isirayeli mu mugambi wa Reta ya Donald Trump wo kongera kugarura amahoro, umutekano n’ubwumvikane hagati ya Isirayeli na Palestina ndetse no kwicarana ku meza amwe mu biganiro by’amahoro.

Intumwa ya Trump, Greenblatt yatangaje ko hakiri imbogamizi zikomeye zikigaragara hagendeye ku biganiro yagiranye n’izi mpande zombi cyane cyane ku bibazo by’ubufasha bwakwifashishwa mu kugarura amahoro muri aka karere.

Umukwe wa Trump, Jared Kushner nawe yari mu ntara ya Ramallah mu biganiro na Minisitiri w’Intebe w’intara ya Palestina, Rami Hamdallah, Minisitiri w’umutungo kamere wa Isirayeli , Moshe Khaon, ndetse n’umuyobozi mukuru wo muri Minisiteri y’umutekano wa Isirayeli ari we Yoav Mordechai.

PNG - 717.9 ko
Intumwa yihariye ya Donald Trump, Jason Greenblatt mu karere k’uburasirazuba bwo hagati muri Isirayeli


kuri uyu wa mbere, ibiro bya Perezida Donald Trump, White House byatangaje ko Trump yizeye ko amahoro hagati y’Abanyayisirayeli n’Abanyepalestina nta handi azava atari ukwicarana ku meza amwe mu biganiro bigamije amahoro.

Amakuru ava mu butegetsi bwa Amerika avuga ko Greenblatt na Kushner bahagaze muri Arabiya Sawudite mu nzira bagana muri Isirayeli gusa bikavugwa ko nta byinshi bashatse gutangaza kuri uru rugendo rwabo kuko bimwe babigize ubwiru.

Amahoro mu karere ko mu burasirazuba bwo hagati amaze imyaka itari mike ahungabanywa n’ibikorwa bya Isirayeli byo kubaka amazu mu ntara z’abanyepalestina hamwe n’ibitero bikorwa n’abanyepalestina ku banyaisirayeli.

Daniel MUKESHIMANA/Umubavu.com



Tanga igitekerezo kuri iyi nkuru



Igitekerezo