<
<
Urubyiruko rugiye kuvumbura uburyo bushya bwo guhangana n’ibibazo bishingiye ku buzima bw’imyororokere rugiye gufashwa
Yashyizweho kuya 2016-12-03 12:26:19 na admin
VISITS : 84

Imbuto Foundation ku bufatanye n’imiryango nterankunga DFID na UNFPA, batangije gahunda yiswe ‘Innovation Acceleration’ (iAccelerator), igamije gufasha urubyiruko kuvumbura uburyo bushya bwo guhangana n’ibibazo bishingiye ku buzima bw’imyororokere, hatezwa imbere kurufasha kwihangira imirimo.

Muri iyi gahunda yatangijwe kuri uyu wa Gatanu tariki 2 Ukuboza 2016, muri Kaminuza y’u Rwanda, ishami ry’ubukungu n’ubucuruzi (UR-CBE), urubyiruko ruzatanga ibitekerezo by’imishinga igaragaza ibibazo bishingiye ku buzima bw’imyororokere n’ibisubizo byabyo, rufashwe kubishyira mu bikorwa.

Ibarura riheruka ryagaragaje ko Abanyarwanda 62% bari munsi y’imyaka 25. Uyu mubare munini w’urubyiruko ukomeje kugarizwa n’ibibazo birimo inda zitateguwe, indwara zandurira mu mibonano mpuzabitsina zirimo virusi itera Sida, ihohoterwa rishingiye ku gitsina n’ibindi bishobora kwangiza ahazaza habo.

Umuyobozi mukuru w’agateganyo wa Imbuto Foundation, Sandrine Umutoni, yasobanuye ko gahunda ya iAccelerator yatekerejweho kugira ngo urubyiruko ubwarwo rwivugutire umuti w’ibyo bibazo, ariko runiteze imbere kuko imishinga ruzatanga igomba kuba yerekana uburyo izanunguka.

JPEG - 285.9 ko
Umuyobozi Wungirije wa DFID, Kenny Osborne, Umuyobozi Wungirije wa UNFPA, Daniel Alemu, Umuyobozi Mukuru Wungirije wa Imbuto Foundation, Sandrine Umutoni n’Intumwa ya Minisante, Dr. Anicet Nabonimpa

Yagize ati “Intego y’uyu mushinga ni ukureba ibibazo bishingiye ku buzima bw’imyororokere byugarije ingimbi n’abangavu no kubishakira ibisubizo. Ni ibitekerezo biri mu bwoko bw’ubushabitsi (Business), bikazahabwa inkunga yo gutangira ariko bikagaragaza ko bizakomeza kubaho bikabyara inyungu, bigatunga nyirabyo n’abandi.”

Akomeza avuga ko guhera uyu munsi urubyiruko rwo mu gihugu hose ruri hagati y’imyaka 18-30 bashobora kugaragaza ibisubizo by’ibyo bibazo babinyujije mu gutanga ibitekerezo by’imishinga babinyujije ku rubuga rwa internet www.iaccelerator.rw kugeza kuwa 23 Mutarama 2017.

Umuyobozi wungirije wa DFID, Tonny Osbonne, yavuze ko iyi gahunda igamije gushishikariza urubyiruko kugira ibitekerezo byo kwihangira imirimo ihindura ubuzima bwa benshi, ikanashakira ibisubizo ibibazo ku buzima bw’imyororokere birwugarije.
Yagize ati “Niteze kubona abakiri bato mu Rwanda bagaragaza ibitekerezo bitanga ibisubizo mu gufasha Guverinoma y’u Rwanda n’iy’u Bwongereza kubona igisubizo kirambye cy’iterambere yaba mu Rwanda no ku Isi yose, hibandwa mu guhangana n’ibibazo bikomoka ku buzima bw’imyororokere.”

Yavuze ko iyi ari intangiriro ariko uyu mushinga uzakomeza gufasha urubyiruko gushaka umuti w’ibibazo byugarije sosiyete Nyarwanda n’Isi muri rusange.
Umuyobozi wungirije uhagarariye UNFPA mu Rwanda, Daniel Alemu, yongeyeho ko ibibazo byinshi byugarije urubyiruko ku buzima bw’imyororokere birimo inda zitateganyijwe n’ubwandu bw’agakoko gatera Sida, bikomoka ahanini ku bukene, kubura amakuru ku buzima bw’imyororokere. Asanga iyi gahunda ari intambwe ya mbere yo kubikemura.

Igitekerezo cyizakirwa kigomba kuba cyabyara inyungu ariko gifitanye isano no gushaka igisubizo cy’ibibazo by’ubuzima bw’imyororokere. Urubyiruko rurasabwa kureba muri sosiyete ikibazo gihari kijyanye n’ubuzima bw’imyororokere, bakakigaragaza banerekana uko batekereza cyakemurwa.

Umwe mu rubyiruko rwitabiriye umuhango wo gutangiza iyi gahunda, Nzeyimana Emmanuel, yavuze ko biteguye guhatanira gukora imishinga isubiza ibibazo by’urubyiruko ubwarwo kugira ngo ejo hazaza hazazire ibibazo bishingiye ku buzima bw’imyororokere.

Ati “Bizadufasha gushaka igisubizo twirebeyeho ubwacu, uko numva nakwirinda ikibazo runaka mbigaragaze, ninsinda inkunga bazampa nzakoresha wa mushinga nihangire imirimo ntange n’akazi.”

Imishinga 10 ya mbere izatoranywa izahabwa amahugurwa nyuma havemo ine myiza cyane izahabwa amahugurwa n’ibihumbi 10 by’amadolari byo gutangiza.
Gahunda ya iAccelerator igamije gusigasira ubuzima bw’umubyeyi muri Afurika y’Iburasirazuba n’Amajyepfo. Ikorera mu bihugu nka Angola, Botswana, Burundi, Comoros, Eritrea, Lesotho, Madagascar, Namibia, Rwanda na Swaziland.

TANGA IGITEKEREZO AHA
modération a priori

Ce forum est modéré a priori : votre contribution n’apparaîtra qu’après avoir été validée par un administrateur du site.

Qui êtes-vous ?
Votre message

Ce formulaire accepte les raccourcis SPIP [->url] {{gras}} {italique} <quote> <code> et le code HTML <q> <del> <ins>. Pour créer des paragraphes, laissez simplement des lignes vides.

KWAMAMAZA

KWAMAMAZA
Facebook page
Twitter page