<
<
Umwana ufite umutwe munini ku Isi, yabazwe avanwamo litiro 3,7 z’amatembabuzi
Yashyizweho kuya 2017-01-07 09:43:12 na admin
VISITS : 440

Mrityunjay Das umwana w’umuhungu w’amezi arindwi uvuka mu Buhinde, ufite umutwe munini ku Isi yabazwe havamo litiro 3.7 z’amatembabuzi.

Uyu mwana urwaye indwara ya Hydrocephalus yo kugira amatembabuzi mu mutwe, abaganga basanze biri mu byatumye umutwe we uhindura ishusho yawo.

Mbere yo kubagwa umutwe we wari ufite santimetero 96 z’umurambararo, uza kugabanukaho 26 ugera kuri 70 mu byumweru bitandatu yamaze akurikiranwa n’abaganga.

Umuganga uvurira ku bitaro bya AIIMS mu Mujyi wa Bhuwaneshwar, Dr Dilip Parida, uri kumukurikirana yabwiye Daily Mail dukesha iyi nkuru ko yagejejwe mu bitaro kuwa 20 Ugushyingo 2016 .

Yagize ati “Umwana bamuzanye afite amatembabuzi angana na litiro 5,5 mu mutwe. Ubu tumaze kumukuramo litiro 3,7. Turacyakomeje kumukurikiranira hafi ku buryo umutwe uzagenda umera neza.”

Kamalesh Das na Kavita, ababyeyi b’uyu mwana bavuga ko bari babangamiwe n’abaturanyi babo mu gace ka Ranpur muri Nayagarh babahoza ku nkeke bavuga ko babyaye umwana ufite isura idasanzwe.

Kamalesh Das w’imyaka 35 ukorera i Kolkata ati “Abantu bamwita dayimoni kubera uburyo aremye. Umutwe we n’ugabanuka, imyitwarire y’abaturanyi izahinduka. Ntibazongera kumwita amazina amutesha agaciro nk’umwana w’umutwe munini cyangwa idayimoni.”

Hydrocephalus (indwara uyu mwana arwaye) biva ku ijambo ry’Ikigereki risobanura amazi ari mu bwonko, gusa ubwinshi bw’amatembabuzi buvugwa aha si amazi. Ni indwara irangwa no kwiyongera kw’amatembabuzi mu bwonko, byangiza udutsi two mu mutwe.

Uyirwaye arangwa no kugira umutwe munini, kuribwa umutwe, kugira isesemi, kuruka, kwibagirwa no kutareba neza.

Mrityunjay Das ateruwe na nyina umubyara
Dr Dilip Parida, Umuganga umwitaho avuga ko bagiye kongera kurema umutwe we ukamera neza
Mrityunjay Das ufite umutwe munini ku Isi yarabazwe akurwamo litiro 3.7 z’amatembabuzi

TANGA IGITEKEREZO AHA
KWAMAMAZA
KWAMAMAZA
Facebook page
Twitter page