<
Nyaruguru : Hashyizweho inzu rusange yo kwahukaniramo
Yashyizweho kuya 2017-09-08 00:16:26 na admin
VISITS : 663

Hagamijwe gukemura ibibazo n’amakimbirane akunze kugaragara mu ngo, aho abashakanye bashwana umwe akaba yahohotera mugenzi we ubuyobozi bw’akarere ka Nyaruguru ku bufatanye n’abafatanyabikorwa bashyizeho inzu izajya ikemurirwamo ibyo bibazo igatangirwamo n’inama.

Iyo nzu yubatse mu Murenge wa Nyagisozi aho irimo abakozi bashinzwe gufasha abantu bahuye n’ihohoterwa bakabahuza n’abo bagiranye ibibazo bakabafasha gushaka umuti, byaba ngombwa bakabafasha no kubona ubutabera.

Ni inzu igaragaramo ibyumba n’uburyamo bishobora kurarwamo n’umuntu wahohotewe akaruhuka, aho kujya kurara ahandi mu gasozi cyangwa akahukanira iwabo.

Muri iyi nzu kandi hatangirwa n’izindi serivisi nko gutanga inama ku bafite ibibazo bitandukanye nk’abatewe inda zitifuzwa no kubagira inama mu bijyanye n’amategeko ndetse bagafashwa guhindura imyumvire bakamenya uko bakwirinda ihohohoterwa.

Umuyobozi w’Akarere ka Nyaruguru, Habitegeko François, yavuze ko iyo nzu yubatswe ku nkunga y’umuryango mpuzamahanga witwa Health Poverty Action (HPA), ikaba imaze gutanga umusanzu munini mu kunga ingo zirimo ibibazo by’ihohotera.

Habitegeko ati “Iriya nzu yashyizweho mu buryo bwo gukemura ikibazo cy’ihohotera rigaragara, cyane cyane irishingiye ku gitsina no guhozwa ku nkeke. Ihohotera rikunze kuba nijoro bigatuma hari abantu babura aho bahungira ; iriya nzu nibyo idufasha”.

Obed Bizumutima, umwe mu bagabo bagannye iyo nzu nyuma yuko mu rugo rwe harangwaga ihohotera, avuga ko we n’umugore we bagiriwe inama bakaba batagihohoterana.

Ati “Nari mfite ikibazo mu rugo kuko narwanaga n’umugore dupfa ko nasesaguye umutungo. Kuko ari njyewe watezaga imvururu mu rugo umugore yaje kundega ku murenge batwohereza hano ngo batugire inama”.

Umugore we Christine Nyiraneza, avuga ko mu rugo rwabo hahoraga ihohotera aho yarwanaga n’umugabo we buri munsi kubera gupfa umutungo, ariko kuri ubu bakaba babanye neza kubera inama bagiriwe.

Ati “Umugabo wanjye yatahaga yasinze akaza ambwira nabi, natekereza n’imitungo asesagura n’abana baburaye nkamutuka tukarwana, ariko ubu nta kibazo dufite mu rugo n’imirimo yose turayifatanya, ubu ntabwo tukirwana ngo nahukane njye iwacu. Mbere iki kigo kitarubakwa narahukanaga nkajya iwacu, ariko ubu nta makimbirane akigaragara mu rugo rwacu”.

Umwe mu bakozi bashinzwe kwakira abagana iyo nzu, Odette Uwikunda, avuga ko mu kwezi bakira abantu bari hagati ya 20 na 30 kandi baza bafite ibibazo bitandukanye bifitanye isano n’ihohotera mu bo bakira hakaba harimo n’abagabo bahohoterwa n’abagore babo.

Ati “Dukora buri munsi amasaha yose, mu gihe cy’ukwezi dushobora kwakira abantu bagera kuri 20, abantu twakira baba bafite ibibazo bitandukanye birimo gusesagura umutungo bakabipfa, gucana inyuma no guharika ndetse no guhozanya ku nkeke.

N’abagore bahohotera abagabo babo, kuko hari umugabo nakiriye umugore yamukubise inkono mu mutwe amusatura umutwe, icyo gihe yaraje n’umugore tubagira inama umugabo amusabira imbabazi, turabigisha ubu babanye neza”.

Ubuyobozi bw’akarere ka Nyaruguru buvuga ko usibye iyi nzu hari n’izindi ngamba zashyizweho mu gukemura ibibazo by’amakimbirane yo mu ngo birimo umugoroba w’ababyeyi, inteko z’abaturage, itorero, ibiganiro n’ibindi.

Inzu itangirwamo ubujyanama aho abaturage bita inzu yo kwahukaniramo
Imbere muri kimwe mu byuma aho uwagannye iyi nzu ashobora kuruhukira
TANGA IGITEKEREZO AHA
modération a priori

Ce forum est modéré a priori : votre contribution n’apparaîtra qu’après avoir été validée par un administrateur du site.

Qui êtes-vous ?
Votre message

Ce formulaire accepte les raccourcis SPIP [->url] {{gras}} {italique} <quote> <code> et le code HTML <q> <del> <ins>. Pour créer des paragraphes, laissez simplement des lignes vides.

KWAMAMAZA
KWAMAMAZA
Facebook page
Twitter page