<
Kirehe : Babiri bafashwe bapakiye ibiro 165 by’urumogi mu modoka
Yashyizweho kuya 2017-08-02 00:18:22 na admin
VISITS : 124

Ahagana saa yine z’ijoro ryo ku wa 30 Nyakanga uyu mwaka, Polisi y’u Rwanda mu karere ka Kirehe yafashe abantu babiri bapakiye ibiro 165 by’urumogi mu modoka y’ubwoko bwa Mark 2 ifite nimero ziyiranga UAM 028 J.

Hafashwe uwari uyitwaye witwa Mugambage Jean Marie Vianney na Hakizimana Revelien ukekwa kuba ari we nyirarwo.

Umuvugizi wa Polisi y’u Rwanda mu Ntara y’i Burasirazuba, Inspector of Police (IP) Jean Bosco Dusabe yavuze ko bafatiwe kuri bariyeri ya Polisi yo mu kagari ka Cyunuzi, mu murenge wa Gatore.

Yagize ati,"Abapolisi bagize amakenga y’ibyo bapakiye muri iyo modoka, barayisaka ; maze basanga urwo rumogi rwari mu mifuka itanu ruhishe ahagenewe imitwaro (mu gice cyayo cy’inyuma)."

Yongeyeho ko Polisi ikomeje gushaka umuntu wa gatatu wari hamwe n’abo babiri wirutse ubwo Polisi yahagarikaga imodoka barimo.

IP Dusabe yihanangirije abishora mu biyobyabwenge agira ati, "Amayeri y’ababyinjiza mu gihugu, ababitunda, ababicuruza n’ababikoresha turayazi. Ababikora turabagira inama yo kubihagarika batarafatwa ngo babihanirwe."

Yavuze ko Mugambage na Hakizimana bafungiwe kuri Sitasiyo ya Polisi ya Kirehe ; kandi ko urwo rumogi n’imodoka ryari rupakiyemo na byo ari ho birindiwe mu gihe iperereza rikomeje.

Yakomeje ubutumwa bwe agira ati, "Ntiduhwema gukangurira abantu b’ingeri zose kwirinda ibiyobyabwenge, ariko haracyari bake bakomeje kubyishoramo. Ababikora baragirwa inama yo kubireka bataragerwaho n’ingaruka z’icyo cyaha zirimo gufungwa no gucibwa ihazabu."

Yavuze ko iperereza ry’ibanze rigaragaza ko urwo rumogi rwinjijwe muri ako gace ruvanwe muri kimwe mu bihugu bihana imbibi n’U Rwanda ; bityo asaba by’umwihariko abatuye hafi y’imipaka n’abakoresha ibyambu gufata iya mbere mu gukumira iyinjizwa ry’ibiyobyabwenge mu gihugu.

Umuvugizi wa Polisi y’u Rwanda muri iyi Ntara yasabye abayituye kwirinda ibiyobyabwenge aho biva bikagera no kugira uruhare mu kurwanya iyinjizwa ryabyo mu gihugu, icuruzwa, ikoreshwa n’inyobwa ryabyo atungira agatoki Polisi ababikora.

Yavuze ko umuntu uhamwe n’icyaha cyo kwishora mu biyobyabwenge ahabwa ibihano bikomeye nk’uko biteganywa n’ingingo zo mu gitabo cy’amategeko ahana ibyaha mu Rwanda kuva ku ya 593 kugeza ku ya 597 ; Ingingo ya 594 ikaba ivuga ko umuntu wese unywa, witera, uhumeka, wisiga cyangwa ukoresha ubundi buryo ubwo ari bwo bwose ibiyobyabwenge n’urusobe rw’imiti ikoreshwa nka byo mu buryo bunyuranyije n’amategeko, ahanishwa igifungo kuva ku mwaka umwe (1) kugeza ku myaka itatu (3) n’ihazabu y’amafaranga y’u Rwanda kuva ku bihumbi mirongo itanu (50.000) kugeza ku bihumbi magana atanu (500.000).

Iyi ngingo (594) ikomeza ivuga ko umuntu wese ukora, uhindura, winjiza, ugurisha mu gihugu ibiyobyabwenge n’urusobe rw’imiti ikoreshwa nka byo mu buryo bunyuranije n’amategeko ahanishwa igifungo kuva ku myaka itatu (3) kugeza ku myaka itanu (5) n’ihazabu y’amafaranga y’u Rwanda kuva ku bihumbi magana atanu (500.000) kugeza kuri miliyoni eshanu (5.000.000). Ibikorwa bivugwa mu gikacya 2 cy’iyi ngingo, mu gihe bikozwe mu rwego mpuzamahanga, ibihano byikuba kabiri.

TANGA IGITEKEREZO AHA
modération a priori

Ce forum est modéré a priori : votre contribution n’apparaîtra qu’après avoir été validée par un administrateur du site.

Qui êtes-vous ?
Votre message

Ce formulaire accepte les raccourcis SPIP [->url] {{gras}} {italique} <quote> <code> et le code HTML <q> <del> <ins>. Pour créer des paragraphes, laissez simplement des lignes vides.

KWAMAMAZA
KWAMAMAZA
Facebook page
Twitter page